اسلام آباد ( پاک ترک نیوز) وفاقی کابینہ نے نیشنل ہاؤسنگ پالیسی 2026 کی منظوری دے دی، جسے پاکستان کے ہاؤسنگ اور شہری ترقی کے شعبے میں اہم پیش رفت قرار دیا جارہا ہے۔
وزارتِ ہاؤسنگ اینڈ ورکس کے مطابق نئی ہاؤسنگ پالیسی کی منظوری گزشتہ کابینہ اجلاس میں دی گئی۔ پاکستان میں گزشتہ قومی ہاؤسنگ پالیسی 2001 میں منظور ہوئی تھی، یوں تقریباً 25 سال بعد ملک کو نئی قومی ہاؤسنگ پالیسی ملی ہے۔
وفاقی وزیر ہاؤسنگ اینڈ ورکس میاں ریاض حسین پیرزادہ اور وزارت کے سیکریٹری نے پالیسی کی تیاری میں کردار ادا کرنے والے پالیسی اینڈ پلاننگ ونگ کی کاوشوں کو سراہا۔
نیشنل ہاؤسنگ پالیسی 2026 کا مقصد ملک میں مناسب، سستی اور پائیدار رہائش کی فراہمی، شہری ترقی کو بہتر بنانا اور عوام کی بنیادی سہولیات و رہائشی مواقع تک رسائی میں اضافہ کرنا ہے۔
پالیسی میں ہاؤسنگ کے شعبے سے متعلق 9 اہم موضوعات شامل کیے گئے ہیں، جن میں رہائش کے لیے زمین کی دستیابی، ہاؤسنگ فنانس، تعمیراتی خدمات، جدید ٹیکنالوجی اور تعمیراتی مواد، درمیانے اور ثانوی شہروں کی ترقی، کچی آبادیوں کی بہتری، سستے گھروں کی فراہمی، دیہی رہائش اور استعدادِ کار میں اضافہ شامل ہیں۔
یہ بھی پڑھیں: یو ٹیوب نے کیریئٹرز کی ایک اور بڑی مشکل آسان کردی
پالیسی میں متوازن شہری ترقی، ادارہ جاتی اور قانونی اصلاحات کے ساتھ ساتھ موسمیاتی تبدیلیوں سے محفوظ اور ماحول دوست رہائش کے لیے بھی جامع فریم ورک وضع کیا گیا ہے۔
وفاقی وزیر نے پالیسی کی منظوری کو وزارت کے لیے تاریخی سنگِ میل قرار دیتے ہوئے کہا کہ نئی پالیسی ملک میں رہائشی قلت اور بڑھتے ہوئے شہری مسائل سے نمٹنے کے لیے واضح سمت فراہم کرے گی۔
وزارتِ ہاؤسنگ اینڈ ورکس کے مطابق نیشنل ہاؤسنگ پالیسی 2026 کا مسودہ عوامی معلومات اور جائزے کے لیے وزارت کی سرکاری ویب سائٹ پر دستیاب ہے۔
