اسلام آباد ( پاک ترک نیوز) پیپلز پارٹی کے رہنما اور سابق اسپیکر قومی اسمبلی راجہ پرویز اشرف نے پمز ہسپتال سانحے پر قومی اسمبلی میں اظہارِ خیال کرتے ہوئے کہا ہے کہ سانحہ پمز پر پوری قوم سوگوار ہے، یہ سیاست کی بات نہیں بلکہ ایک المیہ ہے۔
راجہ پرویز اشرف نے کہا کہ اس واقعے سے ہر پاکستانی کا دل دکھی ہے اور ہر آنکھ اشکبار ہے، ہمیں اس سانحے کو محض ایک واقعہ سمجھ کر بھول نہیں جانا چاہیے۔انہوں نے کہا کہ جب بھی ملک میں کوئی سانحہ پیش آتا ہے تو پورے ملک میں ہلچل مچ جاتی ہے، ہر سانحے کے بعد تحقیقاتی کمیٹی بنا دی جاتی ہے، لیکن کچھ دن گزرنے کے بعد لوگ واقعہ بھول جاتے ہیں۔سابق اسپیکر نے کہا کہ ہمیں پورے صحت کے نظام کو ٹھیک کرنا ہوگا، آج تک یہ بھی معلوم نہیں ہوسکا کہ پمز میں آگ کیسے لگی۔
یہ بھی پڑھیں: سانحہ پمز کے ذمہ داروں کا تعین کیا جا رہا ہے، کسی کو نہیں چھوڑیں گے: مصطفیٰ کمال
راجہ پرویز اشرف نے مطالبہ کیا کہ پمز سانحے کی مکمل تحقیقات کے لیے پارلیمان کی کمیٹی بنائی جائے تاکہ واقعے کی وجوہات سامنے لائی جائیں اور مستقبل میں ایسے سانحات کی روک تھام یقینی بنائی جاسکے۔
