کراچی ( پاک ترک نیوز) گڈز ٹرانسپورٹ اونرز اتحاد اور حکومتی کمیٹی کے درمیان مذاکرات کا دوسرا دور شروع ہوگیا۔
حکومت کی جانب سے وفاقی وزیر مواصلات عبدالعلیم خان گڈز ٹرانسپورٹرز سے مذاکرات کر رہے ہیں۔
مذاکرات کا پہلا دور گزشتہ رات طویل نشست کے بعد بے نتیجہ ختم ہوگیا تھا، جس کے بعد ٹرانسپورٹرز آج ایک مرتبہ پھر حکومت کے ساتھ مذاکرات کے لیے بیٹھ گئے ہیں۔
صدر آل پاکستان گڈز ٹرانسپورٹ اونرز ایسوسی ایشن اتحاد محمد اویس چوہدری کے مطابق گزشتہ روز ہونے والی طویل نشست میں وفاقی وزیر مواصلات عبدالعلیم خان نے ٹرانسپورٹرز کے مطالبات کو جائز قرار دیا تھا۔
انہوں نے بتایا کہ وفاقی وزیر نے مطالبات پر پیش رفت کی یقین دہانی بھی کروائی تھی۔
محمد اویس چوہدری کا کہنا ہے کہ ٹرانسپورٹرز کے مطالبات جائز، قانونی اور ٹرانسپورٹ کے شعبے کے بنیادی مسائل سے متعلق ہیں۔
ان کا کہنا تھا کہ جب تک مطالبات تسلیم نہیں کیے جاتے، ملک بھر میں جاری پہیہ جام ہڑتال ختم نہیں کی جائے گی۔
آل پاکستان گڈز ٹرانسپورٹ اونرز ایسوسی ایشن کے مطابق ملک بھر میں گڈز ٹرانسپورٹرز کی پہیہ جام ہڑتال آج چوتھے روز بھی جاری ہے۔
یہ بھی پڑھیں: گڈز ٹرانسپورٹرز کی چوتھے روز ملک گیر ہڑتال، آج حکومت سے مذاکرات ہونگے
حکومت اور ٹرانسپورٹرز کے درمیان مذاکرات کے دوسرے دور میں مطالبات پر اتفاق رائے پیدا کرنے کی کوشش کی جارہی ہے۔
