از: سہیل شہریار
شنگھائی تعاون تنظیم (ایس سی او) کے سربراہان مملکت کی کونسل کا دو روزہ اجلاس آ نے والے 10برسوں کے لئے تنظیم کی ترقیاتی حکمت عملی کی اہم ترین دستاویز اور اجلاس کے اعلامیہ سمیت 20 سے زائد دستاویزات پر دستخطوں کے ساتھ آئندہ برس کے لئے تنظیم کی قیادت جمہوریہ کرغیز کے سپرد کر کے اختتام پزیر ہو گیا ہے۔
اجلاس میں وزیر اعظم شہباز شریف سمیت دیگر رکن ملکوں کے سربراہوں نے بھی اظہار خیال کیا۔شہباز شریف نے کہا کہ پاکستان امن کا خواہاں ہے۔ہم اپنے تمام پڑوسیوں سے معمول کے مستحکم تعلقات چاہتےہیں۔ وزیر اعظم نے کہا کہ چین کی کامیابیاں صدر شی جن پنگ کی مدبرانہ اور بصیرت افروز قیادت کا نتیجہ ہیں۔ پاک-چین اقتصادی راہداری (سی پیک) دونوں ممالک کے درمیان تعاون کا بہترین منصوبہ ہے۔انہوں نے کہا کہ بلوچستان اور خیبر پختونخوا میں دہشت گرد حملوں میں بیرونی ہاتھ ملوث ہونے کے ثبوت موجود ہیں، گھناؤنے جرائم کے ذمہ داروں اور ان کے سہولت کاروں کو جواب دہ ہونا ہوگا۔
وزیراعظم نے کہا کہ پاکستان شدید بارشوں، گلوبل وارمنگ، کلاؤڈبرسٹ اور تباہ کن سیلاب کی لپیٹ میں ہے۔ سیلاب سے انفرااسٹرکچر، کھڑی فصلوں اور مویشیوں کو شدید نقصان پہنچا ہے، بہادر اور ثابت قدم عوام امدادی اور بحالی کے کاموں میں مصروف ہے۔انہوں نے کہا کہ گزشتہ ڈیڑھ سال میں پاکستان کی متاثر کن معاشی بحالی سب کے سامنے ہے، ہمارا معاشی تبدیلی کا منصوبہ تین ستونوں پر مبنی ہے، تجارت، انفرااسٹرکچر، زراعت۔ جبکہ آئی ٹی اور معدنی وسائل میں نئی سرمایہ کاری معاشی تبدیلی کا پہلا ستون ہے۔
https://www.youtube.com/watch?v=COnecX4ZyTU
دریں اثناایس سی او کے 25ویں سربراہی اجلاس کے دوسرے اور اختتامی روز 10رکن ملکوں نے جن اہم دستاویزات پر دستخط کئے ان میں شنگھائی تعاون تنظیم کے سربراہان مملکت کی کونسل کا تیانجن اعلامیہ اور2035 تک ایس سی او کی ترقیاتی حکمت عملی کی دستاویز سر فہرست تھے۔اسی کے ساتھ رکن ملکوں نے2026تا2030 کے لیے شنگھائی تعاون تنظیم کے رکن ممالک کے درمیان انتہا پسندانہ نظریات کا مقابلہ کرنے کے لیے تعاون کے پروگرام۔2030 تک ایس سی او توانائی تعاون ترقیاتی حکمت عملی کے نفاذ کے لیے روڈ میپ۔لاؤ پیپلز ڈیموکریٹک ریپبلک ڈائیلاگ کو ایس سی او کے ساتھ پارٹنر کا درجہ دینے۔ایس سی او کو کامن ویلتھ آف انڈیپنڈنٹ اسٹیٹس (سی آئی ایس) کے اندر مبصر کا درجہ دینے ؛· کرغیز جمہوریہ کے شہر چولپون اتا کو 2025-2026 کے لیے تنظیم کا سیاحتی اور ثقافتی دارالحکومت قرار دینے؛ایس سی او کے سیکرٹری جنرل کے دستاویزات پر دستخط کرنے کے اختیارات ؛17 جون 2004 کو عوامی جمہوریہ چین میں ایس سی او سیکرٹریٹ کے قیام کی شرائط پر ایس سی او اور عوامی جمہوریہ چین کی حکومت کے درمیان معاہدے کےپروٹوکو ل سمیت دیگر دستاویزات پر دستخط کئے ۔
ایس سی او کے اجلاس کے اختتام کے ساتھ اب وزیر اعظم شہباز شریف اور انکے وفد کا تین روزہ سرکاری دورہ شروع ہو گیا ہے۔
