واشنگٹن(پاک ترک نیوز ) سعودی عرب کے معاون وزیر دفاع برائے ایگزیکٹو امور ڈاکٹر خالد البیاری نے امریکہ کا دورہ کیا، جہاں انہوں نے دونوں ممالک کے درمیان دفاعی تعاون، عسکری صنعت، ٹیکنالوجی کی منتقلی اور علاقائی سلامتی کے فروغ سے متعلق اعلیٰ سطحی ملاقاتیں کیں۔
دورے کا آغاز امریکی ڈیفنس سیکیورٹی کوآپریشن ایجنسی سے ہوا، جہاں ڈاکٹر خالد البیاری نے ادارے کی ڈائریکٹر میری مورگن سے ملاقات کی۔ اس موقع پر دفاعی صنعتی تعاون اور باہمی دلچسپی کے مختلف امور پر تبادلہ خیال کیا گیا۔
بعد ازاں پینٹاگون میں ڈاکٹر خالد البیاری نے امریکی نائب وزیر دفاع برائے حصول و پائیداری مائیکل ڈفی، نائب وزیر دفاع برائے پالیسی ایلبرج کولبی اور امریکی فضائیہ کے بین الاقوامی امور کے نائب سیکریٹری جینٹری اسٹیفن سے الگ الگ ملاقاتیں کیں۔
ملاقاتوں میں سعودی عرب اور امریکہ کے درمیان دفاعی تعاون کو مزید مضبوط بنانے، اسٹریٹجک شراکت داری کے فروغ، علاقائی سلامتی اور مشترکہ مفادات کے تحفظ کے حوالے سے مختلف تجاویز پر غور کیا گیا۔
سعودی معاون وزیر دفاع نے امریکی محکمہ خارجہ کے اسلحہ کنٹرول اور بین الاقوامی سلامتی کے نائب وزیر تھامس ڈی نانو سے بھی ملاقات کی، جس میں سعودی امریکہ تعلقات، علاقائی استحکام اور عالمی سلامتی سے متعلق امور پر تبادلہ خیال کیا گیا۔
دورے کے اختتام پر ڈاکٹر خالد البیاری نے امریکہ کی معروف دفاعی کمپنیوں کے سربراہان سے ملاقات کی۔ اس موقع پر سعودی وژن 2030 کے اہداف کے مطابق دفاعی صنعت، تحقیق و ترقی، ٹیکنالوجی کی منتقلی اور مقامی سطح پر دفاعی صلاحیتوں کے فروغ کے شعبوں میں تعاون کے امکانات کا جائزہ لیا گیا۔
