ریاض ( پاک ترک نیوز) سعودی عرب نے خطے کے تمام ممالک اور عوام کے باہمی مفادات کو یقینی بناتے ہوئے امن اور استحکام کے قیام میں اپنا علاقائی کردار جاری رکھنے کے عزم کا اعادہ کیا ہے۔
یہ بات سعودی وزیر خارجہ شہزادہ فیصل بن فرحان نے ایرانی ہم منصب عباس عراقچی کی طرف سے موصول ہونے والی ٹیلی فون کال کے دوران کہی۔ انہوں نے یقین دلایا کہ سعودی عرب خطے میں دیر پا استحکام اور امن کے فروغ کےلیے اپنی کوششیں جاری رکھے گا۔
اسی ضمن میںامریکی صدر ڈونلڈ ٹرمپ نے کہا ہے کہ سعودی عرب کے ولی عہد اور وزیراعظم شہزادہ محمد بن سلمان ایران کے معاملے میں کشیدگی کم کرنے کے لیے بات چیت کو ترجیح دیتے ہیں۔امریکی صدر نے یہ ریمارکس اس وقت دیے جب انہوں نے ایران کے ساتھ دو معاہدے طے پانے کا اعلان کیا۔ جن میں سے ایک آبنائے ہرمز اور دوسرا ایران کے جوہری پروگرام کے خاتمے سے متعلق ہے۔
سرکاری سعودی میڈیا کے مطابق سعودی عرب کے ولی عہد اور وزیراعظم شہزادہ محمد بن سلمان نےگذشتہ روز امریکی صدر ڈونلڈ ٹرمپ سے ٹیلی فونک رابطہ کیا تھا۔محمدبن سلمان کی ٹرمپ سے گفتگوکرتے ہوئے خطے میں تناؤ کم کرنے کے لیے ڈائیلاگ پر زوردیا۔سعودی ولی عہد نے کہا کہ کشیدگی کم کرنے کے لیے مذاکرات کو ترجیح دی جانی چاہیے۔
یہ بھی پڑھیں: امریکہ اور اسرائیل کا ایران کی توانائی کی تنصیبات پر حملے کا منصوبہ تیار
انہوں نے کہا کہ امن و استحکام کے حصول کے لیے تمام ممکنہ کوششیں کرنا ضروری ہے۔ تاکہ ایسے سفارتی حل کی راہ ہموار ہو سکے جو مثبت نتائج دے، خطے کے امن و سلامتی کا تحفظ کرے اور ایسے وسیع تر تصادم سے بچا جا سکے جس کے اثرات علاقائی اور عالمی سلامتی پر پڑ سکتے ہیں۔
