تہران ( پاک ترک نیوز) ایرانی صدر مسعود پزشکیان کا کہنا ہے امریکا ایران کے حوالے سے اپنا لہجہ اور پالیسی تبدیل کرے، دباؤ، دھمکی اور طاقت کے استعمال سے مسائل حل ہونے کے بجائے مزید پیچیدہ ہوں گے۔
ایرانی سرکاری خبر رساں ادارے ارنا کے مطابق صدر مسعود پزشکیان نے پاکستان کے آرمی چیف فیلڈ مارشل سید عاصم منیر سے ملاقات کے دوران کہا واشنگٹن کو قانون کی حکمرانی اور بین الاقوامی اصولوں کا احترام کرتے ہوئے اسلام آباد میں طے پانے والی مفاہمتی یادداشت کے تحت اپنی ذمہ داریاں پوری کرنی چاہئیں۔
مسعود پزشکیان کے مطابق ایران اور امریکا کے درمیان معاملات میں مثبت پیش رفت کے لیے واشنگٹن کو اپنے رویے اور نقطہ نظر میں تبدیلی لانا ہوگی۔ ایرانی صدر نے ایران اور امریکا کے درمیان کشیدگی کم کرنے اور مذاکراتی عمل میں پاکستان کے تعمیری کردار کو سراہتے ہوئے اسلام آباد کا شکریہ بھی ادا کیا۔
انہوں نے امید ظاہر کی کہ ایران اور پاکستان کے درمیان جاری تعاون مفاہمتی یادداشت کے مقاصد کے حصول میں مددگار ثابت ہوگا۔ یہ مفاہمتی یادداشت جون میں پاکستان کی ثالثی سے ایران اور امریکا کے درمیان طے پائی تھی۔
یہ بھی پڑھیں: پاکستان امن کا داعی، فیلڈ مارشل سید عاصم منیر کا دورہ ایران، ایران امریکا کشیدگی کے خاتمے کیلئے اہم ملاقاتیں
دوسری جانب ایرانی پارلیمنٹ کے اسپیکر محمد باقر قالیباف اور سپریم نیشنل سکیورٹی کونسل کے سیکریٹری محسن رضائی نے بھی فیلڈ مارشل سید عاصم منیر سے الگ الگ ملاقاتیں کیں۔ملاقاتوں کے دوران ایرانی رہنماؤں نے امریکا پر مفاہمتی یادداشت میں کیے گئے وعدوں کی پاسداری نہ کرنے کا الزام عائد کیا۔
محمد باقر قالیباف کا کہنا تھا کہ امریکا ماضی میں متعدد مرتبہ اپنے وعدوں سے پیچھے ہٹ چکا ہے، جبکہ محسن رضائی نے واشنگٹن پر زور دیا کہ وہ اپنا طرزِ عمل تبدیل کرے اور مفاہمتی یادداشت پر عملدرآمد کے لیے عملی اقدامات کرے۔
