لاہور(پاک ترک نیوز)سابق قومی ٹیسٹ فاسٹ بولر محمد عامر نے پاکستان کرکٹ بورڈ کی خصوصی دعوت پر نیشنل کرکٹ اکیڈمی لاہور کا دورہ کیا، جہاں انہوں نے اکیڈمی میں جاری ترقیاتی کاموں اور جدید سہولیات کا جائزہ لیا۔
محمد عامر نے پاکستان کرکٹ میں بہتری کے اقدامات کا کریڈٹ چیئرمین پی سی بی کو دیتے ہوئے کہا اکیڈمی میں جدید سہولیات اور ترقیاتی کام دیکھ کر بے حد خوشی ہوئی ہے۔ انہوں نے کہا کہ اگر ترقیاتی منصوبوں میں اسی طرح تسلسل رہا تو پاکستان کرکٹ میں نمایاں بہتری آئے گی۔ محمد عامر نے مزید کہا کہ موجودہ نوجوان کرکٹرز خوش قسمت ہیں جنہیں جدید سہولیات، بہترین ماحول اور ورلڈ کلاس ری ہیب فراہم کیا جا رہا ہے۔
محمد عامر نے کہا اکیڈمی میں نصب نئی بولنگ مشین بلے بازوں کی تکنیک سنوارنے میں مددگار ثابت ہوگی، جبکہ ملتان، سیالکوٹ اور فیصل آباد میں انڈر 15، انڈر 17 اور انڈر 19 سطح پر گراس روٹ ٹریننگ اور کھلاڑیوں کی ڈائٹ کی نگرانی پاکستان کرکٹ کے مستقبل کے لیے بہترین سرمایہ کاری ہے۔
یہ بھی پڑھیں: سعودی اتحادی فوج نے حوثیوں کے 2ڈرونز تباہ کر دیئے،ریاض کیلئے خطرے کی صورتحال ختم کرنے کا اعلان
ڈائریکٹر ہائی پرفارمنس عاقب جاوید نے کہا کہ پی سی بی سابق کرکٹرز کے تجربات اور تجاویز سے بھرپور فائدہ اٹھانا چاہتا ہے۔ انہوں نے واضح کیا کہ سابق کھلاڑیوں کی قیمتی آرائی اور تجاویز پر مشاورت کے بعد سفارشات حتمی منظوری کے لیے پی سی بی کو پیش کی جائیں گی۔
