لاہور(پاک ترک نیوز) پنجاب حکومت نے پراپرٹی ٹیکس کی ادائیگی کے لیے سیلف اسسمنٹ اسکیم متعارف کراتے ہوئے ٹیکس دہندگان کو نمایاں رعایت دینے کا اعلان کر دیا ہے۔
ایڈیشنل ڈائریکٹر جنرل ایکسائز احمد سعید کے مطابق لاہور سمیت پنجاب بھر میں سیلف اسسمنٹ کے ذریعے پراپرٹی ٹیکس ادا کرنے والوں کو 30 ستمبر تک ادائیگی پر 10 فیصد جبکہ اس کے بعد پورے سال 5 فیصد رعایت دی جائے گی۔
انہوں نے بتایا کہ پرانے پراپرٹی ٹیکس دہندگان اپنی جائیداد کی تفصیلات میں بھی خود تصحیح کر سکیں گے، جبکہ نئے پراپرٹی یونٹس کو شامل کرنے کے لیے شہری محکمہ ایکسائز کی ویب سائٹ پر جا کر خودکار تشخیص اپ لوڈ کر سکتے ہیں۔
یہ بھی پڑھیں: پہلی بار ٹیکس گوشوارہ جمع کرانے والوں کے لیے بڑی سہولت
احمد سعید کے مطابق پہلے سے رجسٹرڈ پراپرٹی یونٹ میں ترمیم کے لیے پراپرٹی ٹیکس بل پر درج 28 ہندسوں پر مشتمل کوڈ سسٹم میں درج کرنے پر متعلقہ پراپرٹی کی تمام تفصیلات سامنے آ جائیں گی۔
انہوں نے کہا کہ سیلف اسسمنٹ نظام کا مقصد کرپشن اور بلیک میلنگ کا خاتمہ اور ٹیکس نظام میں شفافیت لانا ہے۔ ان کے مطابق حکومت کی منظوری کے بعد سیلف اسسمنٹ پر رعایت کا باقاعدہ آغاز کر دیا گیا ہے۔
