اسلام آباد ( پاک ترک نیوز) وزیراعظم محمد شہباز شریف کی زیرِ صدارت فیڈرل بورڈ آف ریونیو کے امور کا جائزہ اجلاس ہوا، جس میں کسٹمز بانڈڈ ویئر ہاؤسز اور ان لینڈ ریونیو انفورسمنٹ سے متعلق معاملات پر بریفنگ دی گئی۔
وزیراعظم نے ہدایت کی کہ ملک بھر کے کسٹمز بانڈڈ ویئر ہاؤسز کا گزشتہ تین سال کا آزادانہ تھرڈ پارٹی آڈٹ کرایا جائے، جبکہ ان ویئر ہاؤسز میں موجود سامان کی فزیکل اسٹاک ویریفکیشن بھی کی جائے۔
شہباز شریف نے واضح کیا کہ کسٹمز بانڈڈ ویئر ہاؤسز میں کسی بھی قسم کی بے ضابطگی کی کوئی گنجائش نہیں۔ انہوں نے ہدایت کی کہ بے ضابطگی یا غیر قانونی سرگرمی میں ملوث اہلکاروں کے خلاف قانون کے مطابق سخت کارروائی کی جائے۔
اجلاس کو بتایا گیا کہ کسٹمز ویئر ہاؤسز میں پیٹرولیم مصنوعات سے متعلق کارگو کی نگرانی وی-باک سسٹم سے منسلک ہے، جبکہ بانڈڈ تجارت ملک کی مجموعی درآمدات کا 16.5 فیصد ہے۔
بریفنگ میں بتایا گیا کہ وزیراعظم کی ہدایت پر ملک بھر کے کسٹمز بانڈڈ ویئر ہاؤسز میں فزیکل اسٹاک ویریفکیشن کرائی جائے گی۔ ویئر ہاؤسز کی لائسنسنگ اور سیکیورٹی یقینی بنانے کے لیے بھی اقدامات کیے جارہے ہیں۔
یہ بھی پڑھیں: سعودی عرب اور پی آئی اے میں فضائی تعاون بڑھانے پر بات چیت
اجلاس کو مزید بتایا گیا کہ کسٹمز بانڈڈ ویئر ہاؤسز کی ویلیوایشن ٹیسٹنگ کرائی جائے گی اور متعلقہ انفارمیشن ٹیکنالوجی سسٹمز کا بھی جائزہ لیا جائے گا۔
وزیراعظم کو بتایا گیا کہ کسٹمز بانڈڈ ویئر ہاؤسز میں موجود بے ضابطگیوں کے خاتمے اور نظام کو مزید مؤثر بنانے کے لیے ضروری اقدامات جاری ہیں۔
