اسلام آباد ( پاک ترک نیوز) اسلام آباد کی معروف آئی ٹی سروسز کمپنی ڈی پی ایل نے عالمی سطح پر ایک بڑا اعزاز حاصل کرتے ہوئے 2026 کی ٹاپ 100 گلوبل موسٹ لووڈ ورک پلیسز فہرست میں 22ویں پوزیشن حاصل کر لی ۔
وفاقی دارالحکومت کے آئی-8 مرکز میں قائم کمپنی نے دنیا بھر کی متعدد بڑی بین الاقوامی کمپنیوں کو پیچھے چھوڑ کر یہ نمایاں کامیابی حاصل کی۔
یہ سالانہ درجہ بندی بیسٹ پریکٹس انسٹی ٹیوٹ کی جانب سے جاری کی جاتی ہے، جس کے لیے 20 سے زائد شعبوں سے تعلق رکھنے والے 28 لاکھ سے زیادہ ملازمین کے سروے کا جائزہ لیا گیا۔
رپورٹ میں کمپنیوں کی درجہ بندی ملازمین کے اعتماد، ادارہ جاتی ثقافت، فیڈبیک کے نظام، ملازمین سے تعلقات اور ٹیلنٹ برقرار رکھنے کی صلاحیت کی بنیاد پر کی گئی۔
رپورٹ کے مطابق صرف اچھی تنخواہیں، جدید مراعات اور لچکدار اوقات کار اب ملازمین کو طویل عرصے تک اداروں سے وابستہ رکھنے کے لیے کافی نہیں رہے۔ 2026 کے ایک عالمی سروے کے مطابق تقریباً 70 فیصد ملازمین اپنی تنخواہوں جبکہ 77 فیصد مراعات سے مطمئن تھے، اس کے باوجود 75 فیصد افراد نئی ملازمتوں کی تلاش میں تھے۔
ڈی پی ایل نے عالمی سطح پر کئی معروف ٹیکنالوجی اور کاروباری اداروں کو پیچھے چھوڑا۔ ، جن میں Cloudflare، Hugging Face، Unisys اور Kraft Heinz سمیت دیگر کمپنیاں شامل ہیں۔
فہرست میں پہلی پوزیشن Donnelley Financial Solutions نے حاصل کی، جبکہ اس کے بعد Kyndryl، Veritiv، IDEAL Industries اور APCO Worldwide شامل ہیں۔
