اسلام آباد ( پاک ترک نیوز) پاکستان نے غزہ امن معاہدے پر عملدرآمد کی جانب ہونے والی مثبت پیش رفت کا خیرمقدم کرتے ہوئے امریکا، مصر، قطر اور ترکیہ کی ثالثی کوششوں کو سراہا ہے۔
ترجمان دفتر خارجہ نے اپنے بیان میں کہا کہ امن منصوبے کے تحت غزہ میں ہونے والی پیش رفت خوش آئند ہے اور امید ہے کہ ثالثی کرنے والے ممالک کی کاوشوں سے معاہدے کے تمام وعدے مکمل کیے جائیں گے۔
ترجمان کے مطابق یہ سفارتی کوششیں فلسطینی عوام کے حقِ خودارادیت کے حصول میں معاون ثابت ہوں گی۔ انہوں نے کہا کہ بین الاقوامی قوانین اور اقوام متحدہ کی متعلقہ قراردادوں کے مطابق فلسطینیوں کو ان کا جائز حقِ خودارادیت ملنا چاہیے۔
یہ بھی پڑھیں: امریکہ غزہ امن معاہدے پر اسرائیل سے عمل درآمد کرانے کا ضامن بن گیا
ترجمان دفتر خارجہ نے اس بات پر بھی زور دیا کہ سیاسی عمل کا منطقی انجام 1967 کی سرحدوں پر مبنی ایک آزاد اور خودمختار فلسطینی ریاست کا قیام ہونا چاہیے، جس کا دارالحکومت القدس الشریف ہو۔
