اسلام آباد ( پاک ترک نیوز) پاکستان تحریکِ انصاف نے وفاقی حکومت کے خلاف مشترکہ تحریک چلانے کے لیے جمعیت علمائے اسلام (ف) سے رابطہ کر لیا ہے اور مشترکہ احتجاج کی تجویز پیش کی ہے۔
پی ٹی آئی کے صوبائی ترجمان شوکت یوسفزئی نے جے یو آئی (ف) کی قیادت سے ہونے والی ملاقات کی تصدیق کرتے ہوئے کہا کہ وفاقی حکومت کے خلاف مؤثر تحریک چلانے کے معاملے پر دونوں جماعتوں میں ہم آہنگی پائی جاتی ہے اور کئی امور پر اتفاق رائے کے قریب پہنچ چکی ہیں۔
دوسری جانب جمعیت علمائے اسلام (ف) نے فی الحال مشترکہ احتجاج کی حمایت سے گریز کیا ہے۔ پارٹی کا مؤقف ہے کہ کسی بھی مشترکہ تحریک یا احتجاج سے قبل دونوں جماعتوں کے درمیان مکمل اعتماد کی بحالی ضروری ہے۔
یہ بھی پڑھیں: آصف زرداری کا ایک برخوردار حکومت کی الٹی گنتی چاہتا ہے، دوسرا نظام کو نقصان پہنچا رہا ہے، رانا ثناء اللہ
آئندہ چند روز میں دونوں جماعتوں کے درمیان مزید رابطوں اور مشاورت کے بعد مشترکہ لائحہ عمل سے متعلق تصویر مزید واضح ہونے کا امکان ہے۔
