حادثات کے مقدمات چیئرمین این ایچ اے ،آئی جی موٹر وے کیخلاف درج کرنے کا حکم

کراچی ( پاک ترک نیوز) سندھ ہائیکورٹ نے ہائی ویز پر حادثات کے مقدمات چیئرمین این ایچ اے اور آئی جی موٹروے کے خلاف درج کرنے کا حکم دے دیا۔
ہائی ویز کی خراب صورتحال کے باعث ٹریفک حادثات کے کیس کی سماعت پر این ایچ اے اور موٹروے پولیس حکام عدالت میں پیش ہوئے۔ این ایچ اے کے وکیل نے کہا کہ لائسنس اور فٹنس کے لئے صوبہ ذمہ دار ہے، سندھ حکومت کو ان فٹ گاڑیوں کو موٹرویز پر آنے سے روکنے کا کئی بار کہا ہے۔
جسٹس نثار بھنبرو نے برہمی کا اظہار کرتے ہوئے ریمارکس دیے کہ این ایچ اے سب سے ناکارہ ادارہ ہے۔ سیفٹی آرڈیننس پڑھ کر دیکھیں ذمہ داری کس کی ہے۔ ہم کہہ دیتے ہیں جہاں سڑک خراب ہو وہاں ٹریفک روک دیں۔ ہائی ویز پر ٹریفک بند ہوا تو نقصان این ایچ اے کو بھرنا ہوگا۔
جسٹس سلیم جیسر نے ریمارکس دیے کہ سکھر سے اسلام آباد کتنا وقت لگتا ہے۔ کیا اتنی دیر میں ہالہ سے سکھر پہنچ سکتے ہیں؟ سندھ کے ساتھ سوتیلوں جیسا سلوک کیوں کیا جاتا ہے؟ کراچی میں پل گرنے کا مقدمہ چیئرمین کے خلاف درج ہونے کے بعد کوئی پل نہیں گرا۔