تہران (پاک ترک نیوز) ایرانی وزارت خارجہ کے ترجمان اسماعیل بقائی نے کہا ہے امریکہ ایران مذاکرات میں پاکستان اور قطر ہی ثالث ہیں ،کوئی اور نہیں ،،دونوں ملکوں کی ثالثی میں کشیدگی کم کرنے کی کوشش جاری ہے ، جبکہ بعض ممالک مذاکراتی عمل کو ناکام بنانے کی کوشش کر رہے ہیں۔
اسماعیل بقائی نے کہا کہ امریکا کے ساتھ مفاہمتی یادداشت میں ساٹھ روز کی کوئی ڈیڈ لائن مقرر نہیں کی گئی۔ ان کے مطابق یادداشت کی مدت کا مقصد صرف پابندیوں کے خاتمے اور جوہری مسئلے کے حل سے متعلق اقدامات تھا۔
ایرانی ترجمان نے واضح کیا کہ ایران کسی ڈیڈ لائن یا دباؤ کے تحت فیصلے نہیں کرتا اور تہران اپنے قومی مفادات کو مدنظر رکھتے ہوئے فیصلے کرے گا۔
اسماعیل بقائی کے مطابق آبنائے ہرمز میں عدم تحفظ کی بنیادی وجہ امریکا کے غیر قانونی اقدامات ہیں۔ دوسری جانب عمان اور ایران آبنائے ہرمز میں بحری آمدورفت کے طریقہ کار اور سلامتی سے متعلق امور پر رابطے جاری رکھے ہوئے ہیں۔
یہ بھی پڑھیں: ایران جنگ طویل ،امریکی فوجی خودکشی کرنے لگے
ایرانی وزارت خارجہ کے ترجمان نے کہا کہ خطے کے بعض ممالک کشیدگی کم کرنے کے لیے فعال سفارتی کردار ادا کر رہے ہیں، تاہم کچھ عناصر مذاکراتی عمل کو ناکام بنانے کی کوشش بھی کر رہے ہیں۔
