مکہ مکرمہ ( پاک ترک نیوز) اسلامی تعاون تنظیم نے سعودی عرب، پاکستان اور ترکیہ کے درمیان ہونے والے مکہ دفاعی معاہدے کا خیرمقدم کرتے ہوئے اسے خطے اور مسلم دنیا کے امن و استحکام کے لیے اہم پیش رفت قرار دیا ہے۔
اسلامی تعاون تنظیم کے سیکرٹری جنرل حسین ابراہیم طہٰ نے سعودی عرب، پاکستان اور ترکیہ کے درمیان مکہ دفاعی معاہدے کو خوش آئند قرار دیتے ہوئے اس اہم اسٹریٹجک اقدام کی مکمل حمایت کا اظہار کیا ہے۔
او آئی سی کی جانب سے سماجی رابطے کی ویب سائٹ ایکس پر جاری بیان کے مطابق سیکرٹری جنرل نے معاہدے کی تکمیل پر تینوں ممالک کی قیادت کو مبارکباد پیش کی اور اس تاریخی معاہدے کے لیے ان کی دانشمندانہ قیادت اور انتھک کوششوں کو سراہا۔
حسین ابراہیم طہٰ نے کہا کہ مکہ دفاعی معاہدہ خطے اور پوری اسلامی دنیا میں امن، سلامتی اور استحکام کے فروغ کے لیے کلیدی اہمیت رکھتا ہے۔
سیکرٹری جنرل او آئی سی کے مطابق یہ معاہدہ خطے اور مسلم دنیا کی سلامتی و استحکام کے لیے ایک بنیادی ستون کی حیثیت رکھتا ہے اور بڑھتے ہوئے سکیورٹی چیلنجز سے نمٹنے کے لیے مشترکہ عزم کی عکاسی کرتا ہے۔
یہ بھی پڑھیں: قومی کرکٹرز کو بیرون ملک لیگز میں شرکت کے لیے این او سی جاری
انہوں نے کہا کہ مکہ دفاعی معاہدہ اسلامی تعاون تنظیم کے رکن ممالک کے درمیان یکجہتی، تعاون اور تعمیری شراکت داری کو فروغ دینے میں بھی اہم کردار ادا کرے گا۔
او آئی سی سیکرٹری جنرل نے اس امید کا اظہار کیا کہ سعودی عرب، پاکستان اور ترکیہ کے درمیان یہ دفاعی تعاون خطے میں امن و سلامتی کے فروغ اور مشترکہ چیلنجز سے نمٹنے کے لیے مزید مؤثر اقدامات کی بنیاد بنے گا۔
