کراچی ( پاک ترک نیوز) نوجوان تاجر میر رضا قتل کیس میں نئی تحقیقاتی ٹیم نے مختلف پہلوؤں سے تحقیقات تیز کردیں، شفاف تحقیقات کے لیے ٹیم کے ارکان کو الگ الگ ذمہ داریاں سونپ دی گئیں۔
ذرائع کے مطابق ایس ایس پی علی رضا کرائم سین پر موجود شواہد جمع کرنے اور مزید جانچ کا کام کررہے ہیں، جبکہ ٹیم میں شامل ڈی ایس پی حنیف اور انسپکٹر چوہدری غضنفر بھی کرائم سین کے شواہد اور جیو فرانزک کے پہلوؤں پر کام کررہے ہیں۔
ذرائع کا کہنا ہے کہ ایس پی انویسٹی گیشن قیس خان کو ڈیجیٹل کرنسی اور دیگر ڈیجیٹل شواہد سے متعلق ذمہ داریاں سونپی گئی ہیں۔ تحقیقاتی ٹیم نے ڈیجیٹل شواہد کے سلسلے میں این سی سی آئی سے بھی رابطہ کرلیا ہے۔
دوسری جانب ایس پی انویسٹی گیشن انعم تجمل میڈیکو لیگل معاملات کی تحقیقات کررہی ہیں۔ ان کی ذمہ داریوں میں پوسٹ مارٹم، قبر کشائی اور لیبارٹری رپورٹس سے متعلق امور بھی شامل ہیں۔
یہ بھی پڑھیں: میر رضا قتل کیس: جوڈیشل کمیشن بنانے کا فیصلہ، نئی تحقیقاتی کمیٹی کا اجلاس آج ہو گا
ذرائع کے مطابق سی پی ایل سی کی تکنیکی معاونت بھی تحقیقاتی ٹیم کو پہلے ہی حاصل ہے۔
نئی تحقیقاتی ٹیم آج بھی ممکنہ جائے وقوع کا دورہ کرے گی اور جائے وقوع سے ملنے والے شواہد سمیت ڈیجیٹل، فرانزک اور میڈیکو لیگل پہلوؤں کو سامنے رکھتے ہوئے تحقیقات کو آگے بڑھایا جائے گا۔
