ریاض ( پاک ترک نیوز) سعودی اتحادی افواج نے حوثیوں کو خبردار کرتے ہوئے کہا ہے کہ مکہ مکرمہ اور مدینہ منورہ کو نشانہ بنانے کی کوششوں کا جواب دینا ضروری ہے۔سعودی اتحادی افواج کے مطابق سعودی عرب پر حوثیوں کے حملے روکنے کے لیے ضروری اقدامات کیے جائیں گے، جبکہ جہاز رانی کی آزادی کو لاحق حوثی خطرے کے خاتمے کے لیے کارروائیاں جاری رکھی جائیں گی۔سعودی اتحادی افواج کا کہنا ہے کہ حوثی کئی سال سے یمنی عوام کے لیے مشکلات کا باعث بنے ہوئے ہیں، جبکہ ان کے جارحانہ اقدامات نے یمنی اتحاد کو بھی نقصان پہنچایا ہے۔
یہ بھی پڑھیں: اساتذہ کا عالمی دن آج منایا جا رہا ہے
اتحادی افواج نے واضح کیا کہ سعودی عرب یمن اور اس کے عوام کے ساتھ کھڑا رہے گا اور خطے میں سلامتی اور استحکام کے لیے اقدامات جاری رکھے گا۔سعودی اتحادی افواج نے حوثیوں پر زور دیا ہے کہ وہ ایسے اقدامات سے گریز کریں جو خطے میں کشیدگی اور عدم استحکام میں اضافے کا باعث بنیں۔
