اسلام آباد( پاک ترک نیوز) ترجمان دفتر خارجہ کے مطابق نائب وزیراعظم اور وزیر خارجہ اسحاق ڈار نے ترک وزیر خارجہ خاقان فیدان سے ٹیلیفون پر گفتگو کی۔دونوں رہنماؤں نے پاکستان اور ترکیہ کے دوطرفہ تعلقات اور باہمی دلچسپی کی علاقائی صورتحال کا جائزہ لیا۔ترجمان دفتر خارجہ کے مطابق اسحاق ڈار اور خاقان فیدان نے فلسطین کے معاملے پر پاکستان اور ترکیہ کے مشترکہ مؤقف کا اعادہ کیا۔
دونوں وزرائے خارجہ نے غیر قانونی اسرائیلی بستیوں سے درآمدات پر برطانیہ کی پابندی کے فیصلے کے حوالے سے آٹھ عرب و اسلامی ممالک کے مشترکہ بیان کی حمایت بھی دہرائی۔پاکستان اور ترکیہ نے برطانیہ سمیت دیگر یورپی ممالک کے دو ریاستی حل سے متعلق مشترکہ بیان کی حمایت کا بھی اعادہ کیا۔گفتگو کے دوران علاقائی معاملات پر قریبی مشاورت جاری رکھنے کی اہمیت پر زور دیا گیا، جبکہ سعودی عرب اور مصر کے ساتھ علاقائی چار ملکی فورم کے ذریعے تعاون جاری رکھنے پر بھی اتفاق کیا گیا۔
یہ بھی پڑھیں: صدر آصف علی زرداری وطن واپس پہنچ گئے
ترجمان کے مطابق اسحاق ڈار اور خاقان فیدان نے اقوام متحدہ کی جنرل اسمبلی کے اجلاس کے موقع پر نیویارک میں ملاقات کرنے پر بھی اتفاق کیا۔
