اسلام آباد(پاک ترک نیوز) نائب وزیراعظم اور وزیر خارجہ اسحاق ڈار شنگھائی تعاون تنظیم کے سربراہانِ حکومت کے اجلاس میں شرکت کے لیے تاجکستان کا دورہ کریں گے۔ اجلاس آج اور کل تاجکستان کے دارالحکومت دوشنبہ میں ہوگا۔
ترجمان دفتر خارجہ کے مطابق اسحاق ڈار تاجکستان کے وزیراعظم قاہر رسول زادہ کی دعوت پر پاکستانی وفد کی قیادت کریں گے۔ اجلاس میں بیلاروس، چین، قازقستان، کرغزستان، روس، تاجکستان اور ازبکستان کے وزرائے اعظم شرکت کریں گے، جبکہ ایران کے نائب صدر اور بھارت کے وزیر خارجہ بھی اجلاس میں شریک ہوں گے۔
ترجمان کے مطابق شنگھائی تعاون تنظیم کی سربراہانِ حکومت کونسل تنظیم کا دوسرا بڑا فیصلہ ساز ادارہ ہے۔ اجلاس میں معیشت، تجارت، مالیات، علاقائی رابطوں اور بجٹ سے متعلق امور پر رہنمائی فراہم کی جائے گی، جبکہ مشترکہ اعلامیہ اور اہم فیصلوں کی منظوری بھی دی جائے گی۔
یہ بھی پڑھیں: میر رضا قتل کیس: جوڈیشل کمیشن کی رپورٹ والدین کو فراہم کی جائے، جبران ناصر
دورے کے دوران نائب وزیراعظم اسحاق ڈار کی تاجکستان کے صدر اور وزیراعظم سے ملاقاتیں بھی متوقع ہیں۔ اس کے علاوہ وہ اجلاس کے موقع پر شنگھائی تعاون تنظیم کے رکن ممالک کے ہم منصبوں سے دوطرفہ ملاقاتیں کریں گے، جن میں باہمی تعلقات اور مختلف شعبوں میں تعاون سے متعلق امور زیرِ بحث آئیں گے۔
