لاہور( پاک ترک نیوز) لاہور میں کام کرنے والی تمام ہائوسنگ اسکیموں میں یکم جولائی سے ایسی جائیدادوں کی خرید وفروخت نہیں ہو سکے گی، جو فائلوں پر مبنی ہوں گی۔ یکم جولائی سے نجی اور عوامی دونوں منصوبوں میں فائل پر مبنی جائیداد کی خرید وفروخت کی اجازت ہوگی۔ پلاٹوں کی خرید و فروخت صرف پنجاب لینڈ ریکارڈ اتھارٹی کے جاری کردہ پراپرٹی سرٹیفکیٹ کے ذریعے کی جائے گی۔
یہ اہم فیصلہ ایل ڈی اے حکام کے ایک اہم اجلاس میں کیا گیا۔ فیصلہ کیا گیا کہ نجی ہاؤسنگ اسکیموں کے ریکارڈ کو پنجاب لینڈ ریکارڈ اتھارٹی کے ایچ ایس ایم ایس سافٹ ویئر سے منسلک کرنا ضروری ہے۔ ہاؤسنگ سوسائٹیوں کو 30 جون تک اپنا ریکارڈ پنجاب لینڈ ریکارڈ اتھارٹی کے سافٹ ویئر پر مبنی ہاؤسنگ سوسائٹیز مینجمنٹ سسٹم کو منتقل کرنا ہوگا۔۔
شہری یکم جولائی سے ان پراپرٹی سرٹیفکیٹس کے ذریعے صرف پلاٹوں کی خرید و فروخت کر سکیں گے۔ اس مقصد کے لیے عوامی آگہی مہم بھی چلائی جائے گی۔ پنجاب لینڈ ریکارڈ اتھارٹی سافٹ ویئر سسٹم میں شفٹ ہونے والی اسکیموں کی حوصلہ افزائی کی جائے گی، جبکہ ادارے کے دائرہ اختیار میں کام کرنے والی وہ اسکیمیں جو یہ سسٹم نہیں اپنائیں گی، ان کے خلاف قانونی کارروائی کی جائے گی۔
پرائیویٹ ہاؤسنگ سکیموں کو یونیفائیڈ سافٹ ویئر سسٹم کے تحت سب رجسٹرار جیسا اختیار دیا جا رہا ہے۔ ایل ڈی اے اور پی ایل آر اے مشترکہ طور پر نجی شعبے کو نئے نظام پر تربیت فراہم کریں گے۔
نجی اسکیمیں ڈیجیٹل پورٹل کے ذریعے گرین سرٹیفکیٹ اور رجسٹریشن خود جاری کر سکیں گی۔ ہر پراپرٹی سرٹیفکیٹ میں ایک کیو آر کوڈ شامل ہوگا، جس سے تمام متعلقہ پراپرٹی کی معلومات کو ایک کلک میں حاصل کیا جا سکتا ہے۔
