اسلام آباد ( پاک ترک نیوز) اسلام آباد الیکٹرک سپلائی کمپنی آئیسکو کے حصص کی نجکاری کے لیے سرمایہ کاروں کو مزید وقت دے دیا گیا۔
نجکاری کمیشن نے سرمایہ کاروں کی جانب سے اظہارِ دلچسپی، یعنی ای او آئی جمع کرانے کی آخری تاریخ 21 ستمبر 2026 تک بڑھا دی ہے۔نئی آخری تاریخ کے مطابق سرمایہ کار 21 ستمبر کو شام 4 بجے تک اپنی درخواستیں جمع کرا سکیں گے۔نجکاری کمیشن کے مطابق تاریخ میں توسیع کا مقصد مقامی اور بین الاقوامی سرمایہ کاروں کو آئیسکو کی مالی اور انتظامی صورتحال کا تفصیلی جائزہ لینے، ڈیو ڈیلیجنس مکمل کرنے اور اپنی پیشکشیں تیار کرنے کے لیے اضافی وقت فراہم کرنا ہے۔
حکومت کے نجکاری پروگرام کے تحت آئیسکو، فیصل آباد الیکٹرک سپلائی کمپنی اور گوجرانوالہ الیکٹرک پاور کمپنی میں نجی شعبے کی شمولیت کی کوشش کی جا رہی ہے۔تینوں کمپنیوں میں سرمایہ کاروں کو 51 فیصد سے 100 فیصد تک حصص اور انتظامی کنٹرول دینے کی پیشکش کی جا رہی ہے۔نجکاری کمیشن کا کہنا ہے کہ آئیسکو کے لیے ای او آئی جمع کرانے کی تاریخ میں توسیع کے علاوہ نجکاری کے عمل کی دیگر شرائط میں کوئی تبدیلی نہیں کی گئی۔
یہ بھی پڑھیں: پاکستان آئی ایم ایف کے 7 میں سے 6 اہداف پورے کرنے کے قریب، ستمبر میں اہم جائزہ متوقع
حکومت کا کہنا ہے کہ بجلی کی تقسیم کے شعبے میں نجی شعبے کی شمولیت سے کارکردگی بہتر بنانے اور انتظامی معاملات نجی سرمایہ کاروں کے سپرد کرنے میں مدد ملے گی۔آئیسکو میں سرمایہ کاری کے خواہش مند مقامی اور غیر ملکی سرمایہ کار نجکاری کمیشن کی ویب سائٹ سے ای او آئی سے متعلق دستاویزات اور مزید معلومات حاصل کرسکتے ہیں۔
