بشکیک (پاک ترک نیوز )وزیراعظم محمد شہباز شریف تین روزہ سرکاری دورے پر کرغزستان کے دارالحکومت بشکیک پہنچ گئے، جہاں وہ شنگھائی تعاون تنظیم کے سربراہی اجلاس سمیت اہم علاقائی اور عالمی امور پر ہونے والی اہم نشستوں میں شرکت کریں گے۔
بشکیک پہنچنے پر کرغزستان کی کابینہ کے چیئرمین عادلبیک قاسمالییف نے وزیراعظم محمد شہباز شریف کا استقبال کیا۔ وزیراعظم کے ہمراہ نائب وزیراعظم و وزیر خارجہ محمد اسحاق ڈار، وفاقی وزراء جام کمال خان، علیم خان اور عطاء اللہ تارڑ سمیت پاکستانی وفد بھی موجود ہے۔
وزیراعظم شہباز شریف شنگھائی تعاون تنظیم کے سربراہی اجلاس سے خطاب کریں گے اور علاقائی و عالمی امور پر پاکستان کا مؤقف پیش کریں گے۔ وہ ایس سی او پلس سربراہی اجلاس میں بھی شرکت کریں گے۔
دورے کے دوران وزیراعظم مختلف ممالک کے رہنماؤں سے دوطرفہ ملاقاتیں بھی کریں گے، جن میں باہمی تعلقات، تجارت و سرمایہ کاری، علاقائی تعاون اور باہمی دلچسپی کے دیگر امور پر تبادلہ خیال کیا جائے گا۔
یہ بھی پڑھیں : وزیراعظم شہباز شریف کی ترکیہ کے یوم فتح پر ترک صدر اور عوام کو مبارکباد
وزیراعظم محمد شہباز شریف کرغزستان کے صدر صادر ژاپاروف سے بھی دوطرفہ ملاقات کریں گے۔ ملاقات میں پاکستان اور کرغزستان کے درمیان دوطرفہ تعلقات کے تمام پہلوؤں کا جائزہ لیا جائے گا۔
وزیراعظم کے دورۂ کرغزستان کے دوران تجارت و سرمایہ کاری، توانائی، علاقائی روابط، تعلیم، سیاحت اور عوامی روابط کے فروغ سمیت مختلف شعبوں میں تعاون بڑھانے پر بھی بات چیت ہوگی۔
وزیراعظم شہباز شریف اپنے دورے کے دوران ورلڈ نومیڈ گیمز کی افتتاحی تقریب میں بطور مہمان خصوصی بھی شرکت کریں گے۔
