اسلام آباد ( پاک ترک نیوز) نیشنل سائبر ایمرجنسی رسپانس ٹیم نے واٹس ایپ ویب، کمپیوٹر اور ای میل کے ذریعے ممکنہ سائبر حملوں کے پیش نظر ہائی الرٹ ایڈوائزری جاری کر دی ہے۔ ایڈوائزری میں سرکاری حکام اور حساس معلومات تک رسائی رکھنے والے افراد کے لیے خطرے کی شدت زیادہ قرار دی گئی ہے۔ایڈوائزری کے مطابق حملہ آور سرکاری حکام اور محکموں کی نقالی کرکے نقصان دہ فائلیں بھیج رہے ہیں، جن کے ذریعے ونڈوز سسٹمز کو متاثر کیا جا سکتا ہے۔ سسٹم متاثر ہونے کی صورت میں ریموٹ کنٹرول حاصل کرنے، پاس ورڈز چرانے اور حساس ڈیٹا تک غیر مجاز رسائی کا خدشہ ہے۔
ایڈوائزری میں خبردار کیا گیا ہے کہ واٹس ایپ ویب سیشن ہائی جیک کرکے متاثرہ صارف کے نمبر سے جعل سازی بھی کی جا سکتی ہے۔ کسی جانے پہچانے نمبر سے غیر متوقع پیغام یا فائل موصول ہونا، جبکہ واٹس ایپ کے لنکڈ ڈیوائسز میں کسی نامعلوم ڈیوائس کا ظاہر ہونا، ممکنہ سائبر حملے کی علامات ہو سکتی ہیں۔نیشنل سائبر ایمرجنسی رسپانس ٹیم نے حساس معلومات رکھنے والے افسران کو ونڈوز کمپیوٹرز پر واٹس ایپ ویب اور ڈیسک ٹاپ استعمال نہ کرنے کی سفارش کی ہے۔ اس کے علاوہ مشکوک سیشنز فوری ختم کرنے، غیر تصدیق شدہ لنکس اور فائلز نہ کھولنے اور بھیجنے والے کی آزادانہ طور پر تصدیق کرنے پر زور دیا گیا ہے۔ایڈوائزری میں صارفین کو ہدایت کی گئی ہے کہ وہ اپنے پاس ورڈز، او ٹی پی اور تصدیقی کوڈز کسی کے ساتھ شیئر نہ کریں، واٹس ایپ کی فائلز سرکاری ونڈوز کمپیوٹرز پر منتقل کرنے سے گریز کریں اور ونڈوز، براؤزر سمیت تمام سافٹ ویئر اپ ڈیٹ رکھیں۔
یہ بھی پڑھیں: توشہ خانہ کا جولائی سے ستمبر تک کا ریکارڈ پبلک، صدر،وزیراعظم بھی تحائف لینے والوں میں شامل
مزید برآں، دوہری تصدیق اور واٹس ایپ ٹو اسٹیپ ویریفکیشن فعال کرنے کی سفارش کی گئی ہے۔ اگر کسی ڈیوائس کے متاثر ہونے کا شبہ ہو تو اسے فوری طور پر نیٹ ورک اور انٹرنیٹ سے الگ کرنے اور متعلقہ پیغامات و لاگز کو ثبوت کے طور پر محفوظ رکھنے کی ہدایت بھی کی گئی ہے۔
