لاہور( پاک ترک نیوز) نوجوانوں میں دل کے دورے کا بڑھتا ہوا خطرہ،طبی ماہرین نے خطرے کی گھنٹی بجا دی ۔ طبی ماہرین کے مطابق اب دل کے امراض صرف بزرگ افراد تک محدود نہیں رہے بلکہ 40 سال سے کم عمر نوجوان بھی تیزی سے اس کا شکار ہونے لگے ہیں ۔ ہسپتالوں میں آنے والے ہر پانچ میں سے تقریباً ایک مریض کی عمر 40 سال سے کم پائی جا رہی ہے، جو ایک خطرناک رجحان کی نشاندہی کرتا ہے۔
ڈاکٹرز کا کہنا ہے کہ اس اضافے کی بڑی وجہ جدید طرزِ زندگی ہے جس میں جسمانی سرگرمیوں کی کمی، بیٹھے رہنے کا زیادہ رجحان، جنک فوڈ کا بڑھتا ہوا استعمال اور ذہنی دباؤ شامل ہیں۔ اس کے علاوہ تمباکو نوشی، نیند کی کمی اور موٹاپا بھی دل کے امراض کو تیزی سے بڑھا رہے ہیں۔
ماہرین صحت کے مطابق نوجوان اکثر اپنی صحت کو نظر انداز کرتے ہیں اور ابتدائی علامات جیسے سینے میں درد، سانس پھولنا، تھکن اور چکر آنا کو معمولی سمجھ لیتے ہیں، جس کے باعث بیماری خطرناک مرحلے تک پہنچ جاتی ہے۔
یہ بھی پڑھیں: سگریٹ ایک خاموش قاتل، ہر سال لاکھوں جانیں نگل جاتا ہے
ڈاکٹروں کا یہ بھی کہنا ہے کہ دل کے دورے کی صورت میں اکثر نوجوان بروقت ہسپتال نہیں پہنچ پاتے، جس کی وجہ سے اموات کی شرح بھی بڑھ رہی ہے۔
طبی ماہرین عوام کو مشورہ دیتے ہیں کہ روزانہ کم از کم 30 منٹ کی ورزش، متوازن غذا، نمک اور چکنائی کی کم مقدار، اور باقاعدہ میڈیکل چیک اپ کو معمول بنایا جائے۔
اس کے ساتھ ساتھ حکومت اور تعلیمی اداروں کو بھی چاہیے کہ صحت مند طرزِ زندگی کے حوالے سے آگاہی مہم چلائیں تاکہ نوجوان نسل کو اس خاموش خطرے سے محفوظ رکھا جا سکے۔
ماہرین کے مطابق اگر فوری طور پر احتیاطی اقدامات نہ کیے گئے تو آنے والے برسوں میں دل کے مریضوں کی تعداد میں مزید خطرناک اضافہ ہو سکتا ہے۔
