لاہور( پاک ترک نیوز) ایک سگریٹ چند لمحوں کی تسکین تو دے سکتا ہے لیکن اس کے اثرات زندگی بھر انسان کا پیچھا کرتے ہیں۔ماہرین صحت کا کہنا ہے کہ سگریٹ نہ صرف پھیپھڑوں بلکہ دل، دماغ اور جسم کے تقریباً ہر عضو کو متاثر کرتا ہے۔
ورلڈ ہیلتھ آرگنائزیشن کے مطابق تمباکو نوشی کے باعث دنیا بھر میں ہر سال 80 لاکھ سے زائد افراد جان کی بازی ہار جاتے ہیں۔ ان میں سے تقریباً 70 لاکھ اموات براہِ راست تمباکو نوشی جبکہ 10 لاکھ سے زائد اموات دوسروں کے سگریٹ کے دھوئیں سے متاثر ہونے کے باعث ہوتی ہیں۔
ماہرین کے مطابق سگریٹ کے دھوئیں میں سات ہزار سے زائد کیمیائی مادے موجود ہوتے ہیں، جن میں سے سینکڑوں نقصان دہ اور درجنوں کینسر کا سبب بن سکتے ہیں۔سگریٹ نوشی پھیپھڑوں کے کینسر، منہ اور گلے کے کینسر، دل کے امراض، فالج، ہائی بلڈ پریشر، سانس کی بیماریوں اور پھیپھڑوں کے دائمی امراض کا خطرہ کئی گنا بڑھا دیتی ہے۔ تمباکو نوشی جسم کی قوتِ مدافعت کو کمزور کرتی اور عمر رسیدگی کے اثرات کو تیز کرتی ہے۔
ڈاکٹروں کا کہناہے سگریٹ چھوڑنے کے فوائد فوری شروع ہو جاتے ہیں۔ صرف 20 منٹ بعد دل کی دھڑکن اور بلڈ پریشر معمول کی طرف آنا شروع ہو جاتے ہیں جبکہ چند ہفتوں میں دورانِ خون اور پھیپھڑوں کی کارکردگی بہتر ہونے لگتی ہے۔ ایک سال بعد دل کے امراض کا خطرہ نمایاں حد تک کم ہو جاتا ہے۔
سگریٹ کیسے چھوڑی جائے؟ماہرین درج ذیل طریقوں کو مؤثر قرار دیتے ہیں،سگریٹ چھوڑنے کی ایک مخصوص تاریخ مقرر کریں۔ گھر، دفتر اور گاڑی سے سگریٹ اور لائٹر ہٹا دیں۔ ۔چائے، کافی یا ایسے ماحول سے وقتی طور پر پرہیز کریں جو سگریٹ نوشی کی خواہش بڑھاتے ہوں۔ ۔پانی زیادہ پئیں اور صحت مند غذا اپنائیں۔ ،۔ورزش اور چہل قدمی کو روزمرہ معمول بنائیں۔ ،اہلِ خانہ اور دوستوں کی مدد حاصل کریں۔ ،ضرورت پڑنے پر ڈاکٹر کے مشورے سے نکوٹین ریپلیسمنٹ تھراپی یا دیگر علاج استعمال کریں۔
ماہرین کا کہنا ہے کہ سگریٹ چھوڑنے کی کوشش میں ناکامی کے بعد دوبارہ کوشش کرنا بھی کامیابی کی طرف ایک قدم ہے، کیونکہ اکثر افراد کئی بار کوشش کے بعد مستقل طور پر تمباکو نوشی ترک کرنے میں کامیاب ہوتے ہیں۔
