واشنگٹن ( پاک ترک نیوز) امریکی نیول فورسز سینٹرل کمانڈ (سینٹ کام) نے تصدیق کی ہے کہ امریکا کے جدید ترین اور سب سے بڑے طیارہ بردار بحری جہاز یو ایس ایس جیرالڈ آر فورڈ میں آگ لگنے کا واقعہ پیش آیا۔
امریکی بحریہ کے مطابق آگ جہاز کے لانڈری سیکشن میں لگی تھی جسے فوری طور پر بجھا لیا گیا۔ واقعے کا کسی جنگی کارروائی سے تعلق نہیں تھا اور جہاز مکمل طور پر آپریشنل ہے۔
بحریہ نے بتایا کہ اس واقعے میں دو سیلرز زخمی ہوئے جنہیں طبی امداد دی جا رہی ہے اور ان کی حالت خطرے سے باہر ہے۔ حکام کے مطابق آگ سے جہاز کے انجن یا دیگر اہم نظام متاثر نہیں ہوئے۔
یو ایس ایس جیرالڈ آر فورڈ اس وقت بحیرہ احمر میں تعینات ہے اور خطے میں جاری کشیدگی کے تناظر میں امریکی آپریشنز کا حصہ ہے۔ اس طیارہ بردار جہاز پر پانچ ہزار سے زائد ملاح سوار ہوتے ہیں جبکہ یہ تقریباً 75 فوجی طیارے لے جانے کی صلاحیت رکھتا ہے، جن میں ایف-18 سپر ہارنیٹ جیسے لڑاکا طیارے بھی شامل ہیں۔
