میکسیکو سٹی: (پاک ترک نیوز) — جنوبی اور وسطی میکسیکو میں جمعہ کے روز 6.5 شدت کے طاقتور زلزلے نے شدید خوف و ہراس پھیلا دیا، جس کے باعث نئے سال کی پہلی پریس بریفنگ کے دوران ہی صدر کلاڈیا شینبام کو بھی خطاب روکنا پڑا جب شہر بھر میں زلزلے کے الارم بج اٹھے۔
اس زلزلے کے نتیجے میں کم از کم دو افراد جاں بحق ہو گئے۔ میکسیکو کے قومی زلزلہ پیما ادارے کے مطابق زلزلے کا مرکز جنوبی ریاست گیرو کے شہر سان مارکوس کے قریب تھا، جو بحرالکاہل کے ساحلی سیاحتی مقام اکاپولکو کے نزدیک واقع ہے۔
زلزلے کے بعد 500 سے زائد آفٹر شاکس ریکارڈ کیے گئے۔ریاستی سول ڈیفنس ادارے نے اکاپولکو اور دیگر شاہراہوں پر پہاڑی تودے گرنے کی اطلاعات دیں، جس سے ٹریفک متاثر ہوئی۔
گیرو کی گورنر ایولین سالگاڈو کے مطابق زلزلے کے مرکز کے قریب ایک چھوٹے قصبے میں 50 سالہ خاتون اس وقت جاں بحق ہو گئی جب اس کا گھر منہدم ہو گیا۔
حکام نے بتایا کہ گیرو کے دارالحکومت چلپان سینگو میں واقع ایک اسپتال کو شدید ساختی نقصان پہنچا، جس کے بعد متعدد مریضوں کو محفوظ مقامات پر منتقل کر دیا گیا۔
زلزلے کے جھٹکے محسوس ہوتے ہی میکسیکو سٹی اور اکاپولکو میں رہائشی اور سیاح گھروں اور ہوٹلوں سے باہر سڑکوں پر نکل آئے۔میکسیکو سٹی کی میئر کلارا بروگاڈا نے بتایا کہ ایک شخص عمارت سے انخلا کے دوران طبی ایمرجنسی کا شکار ہوا اور گرنے کے بعد جان کی بازی ہار گیا۔
میکسیکو میں خوفناک زلزلہ: 6.5 شدت کے جھٹکے، دو ہلاکتیں
