اسلام آباد ( پاک ترک نیوز) عمرہ زائرین کے لیے ویکسینیشن کی شرط کے نفاذ میں توسیع کردی گئی ہے۔ فوکل پرسن کے مطابق عمرہ زائرین اب 25 ستمبر تک بغیر ویکسینیشن کے سعودی عرب جا سکیں گے۔بارڈر ہیلتھ سروسز کے مطابق نادرا کے مربوط ویکسینیشن کارڈ کے نفاذ کی تاریخ میں 25 ستمبر صبح 10 بجے تک توسیع کردی گئی ہے، جس کا باقاعدہ اعلامیہ بھی جاری کردیا گیا ہے۔ذرائع کے مطابق پاکستان ایئرپورٹس اتھارٹی کی جانب سے نادرا کے مربوط ویکسینیشن کارڈ کے نفاذ کے لیے مطلوبہ انتظامات مکمل نہیں کیے گئے تھے۔ بارڈر ہیلتھ سروسز نے ویکسینیشن کے لیے جناح ٹرمینل پر تین کمرے فراہم کرنے کا مطالبہ کیا تھا۔
یہ بھی پڑھیں: عمرہ زائرین کے لیے پولیو، گردن توڑ بخار اور انفلوئنزا کی ویکسین لازمی،لاہور میں صرف ایک مرکز ،زائرین کا رش
عمرہ زائرین اور خلیجی ممالک کا سفر کرنے والے مسافروں کے لیے نادرا کا ویکسینیشن کارڈ لازمی قرار دیا گیا تھا، تاہم کراچی ایئرپورٹ پر ہزاروں مسافروں کے لیے صرف ایک ویکسینیشن مرکز قائم کیا گیا۔یاد رہے کہ ویکسینیشن کارڈ کا نفاذ آج رات 12 بجے سے ہونا تھا، تاہم پاکستان ایوی ایشن اتھارٹی کا کہنا ہے کہ بین الاقوامی مسافروں کے لیے ڈیجیٹل ویکسینیشن کارڈ کی شرط مرحلہ وار نافذ کی جائے گی۔
