اسلام آباد ( پاک ترک نیوز) وفاقی وزیر اطلاعات عطا تارڑ کا کہنا ہے مشکل حالات کے باوجود ریلیف پر مبنی بجٹ بنایا حکومت نے ایسا بجٹ پیش کیا جس کی مخالفین بھی تعریف کررہے ہیں، ٹیکس نہ دینے والا کا بوجھ ٹیکس دینےوالے پر نہیں ڈالا۔
وفاقی وزیراطلاعات عطاتارڑ نے بجٹ پر بریفنگ مٰں کہا ایف بی آر میں اصلاحات کرکے غریب کےلیے ریلیف کا بندوبست کررہے ہیں، 50 ہزار روپے سے کم تنخواہ والے کو ٹیکس سے مستثنیٰ کردیا۔
عطا تارڑ نے کہا 50 ہزار سے ایک لاکھ روپے تنخواہ لینے والا صرف ایک فیصد ٹیکس دے گا، تنخواہ دار طبقے کو تمام سلیبز میں ریلیف پر پوری دنیا تعریف کررہی ہے، حکومتی کاوشوں کی بدولت آج ملک میں معاشی استحکام ہے
عطاتارڑ نے مزید کہا، جنہیں تنقید کی عادت ہو وہ تنقید برائے تنقید پر یقین رکھتے ہیں، آئی ایم ایف سے ہمیشہ ن لیگ نے نجات دلائی ہے، بانی پی ٹی آئی نے کہا تھا کہ خودکشی کرلیں گے لیکن آئی ایم ایف کے پاس نہیں جائیں گے لیکن پھر گئے، پیرس میں شہبازشریف نے آئی ایم ایف سے میٹنگ نہ کی ہوتی تو ملک ڈیفالٹ ہوجاتا۔
عطا تارڑ نے کہا وزیر اعظم شہباز شریف نے ذاتی کوششوں سے آئی ایم ایف سے معاملات طے کیے، حکومتی کاوشوں کی بدولت آج ملک میں معاشی استحکام ہے، گزشتہ 2 سال میں مشکل فیصلے کیے، اب عوام کو ریلیف دینے کی پوزیشن میں ہیں۔
عطا تارڑ نے مزید کہا اپنا گھر منصوبے پر 90 ارب میں سے 11 ارب روپے لوگوں کو مل گئے، ہاؤسنگ کے شعبے میں ترقی سے 12 صنعتوں کا پہیہ چل پڑا، ایکسپورٹرزیادہ منافع کمائے گا تو صنعتوں کے قیام میں مدد ملے گی۔
وزیر مملکت برائے خزانہ نے بلال اظہر کیانی نے کہا کہ یہ بجٹ صنعتکاروں، برآمد کنندگان، خواتین اور نوجوانوں کے لیے ریلیف کا بجٹ ہے، وزیراعظم یوتھ پیکیج کے تحت زرعی قرضوں کے لیے 110 ارب روپے مختص کیے گئے،بینظیر انکم سپورٹ پروگرام کے لیے 838 ارب روپے مختص کیے گئے۔
بلال اظہر کیانی نے مزید کہا حکومت پائیدار بنیادوں پر معاشی استحکام کو برقرار رکھنا چاہتی ہے اور یہ بجٹ ٹیکس نیٹ کو وسعت دینے کے ساتھ ساتھ کاروباری طبقے کے لیے سہولتوں پر بھی مبنی ہے، 5 ارب روپے کی ڈیوٹی ختم کر کے ریلیف دیا گیا ہے۔
