راولپنڈی ( پاک ترک نیوز) سیکیورٹی فورسز کی بلوچستان میں دہشتگردوں کے خلاف کارروائیاں جاری ہیں، کلی زائیک کے علاقے میں انٹیلی جنس بیسڈ آپریشن کے دوران 2 دہشتگرد ہلاک جبکہ 3 زخمی ہوگئے۔
سیکیورٹی ذرائع کے مطابق کارروائی بسیمہ کیمپ سے 12 کلومیٹر شمال میں کلی زائیک اور کاغلی کے درمیان دہشتگردوں کی موجودگی کی اطلاع پر کی گئی۔
سیکیورٹی فورسز اور دہشتگردوں کے درمیان فائرنگ کے تبادلے میں 2 دہشتگرد ہلاک اور 3 زخمی ہوئے۔
سیکیورٹی ذرائع کے مطابق ہلاک دہشتگردوں میں سے ایک کی شناخت مشتاق احمد عرف کوہ یار کے نام سے ہوئی ہے۔
کارروائی کے دوران دہشتگردوں کے قبضے سے گولہ بارود، میگزین، دستی بم اور دیسی ساختہ بم تیار کرنے کا سامان بھی برآمد کیا گیا۔
یہ بھی پڑھیں: جماعت اسلامی کے کراچی، لاہور اور پشاور میں دھرنے،ہمارا احتجاج عوام کیلئے ہے ،حافظ نعیم
سیکیورٹی ذرائع کا کہنا ہے کہ علاقے میں ممکنہ دیگر دہشتگردوں کی موجودگی کے پیش نظر کارروائی اور سرچ آپریشن جاری رہا۔
سیکیورٹی فورسز نے دہشتگردی کے مکمل خاتمے اور بلوچستان میں دیرپا امن کے قیام تک بلا تعطل کارروائیاں جاری رکھنے کے عزم کا اظہار کیا ہے۔
