مظفر آباد ( پاک ترک نیوز) آزاد کشمیر کے انتخابات میں پولنگ کے عمل میں تاخیر اور پیپلز پارٹی کے پولنگ ایجنٹس کو مبینہ طور پر پولنگ اسٹیشنز میں داخلے سے روکنے پر پیپلز پارٹی کی نائب صدر سینیٹر شیری رحمان نے شدید تحفظات کا اظہار کیا ہے۔ شیری رحمان نے الیکشن کمیشن سے فوری مداخلت اور انتخابی عمل میں رکاوٹوں کا ازالہ کرنے کا مطالبہ کیا ہے۔
سینیٹر شیری رحمان نے کہا ہے کہ ایل اے 16 کے پولنگ اسٹیشن نمبر 61 اور ایل اے 15 کے پولنگ اسٹیشنز نمبر 87، 143 اور 144 پر بروقت پولنگ شروع نہ ہونا تشویشناک ہے۔
ان کا کہنا تھا کہ پولنگ میں تاخیر کا خمیازہ ووٹرز کو نہیں بھگتنا چاہیے، ضائع ہونے والا وقت پورا کرکے شہریوں کو اپنا حق رائے دہی استعمال کرنے کا مکمل موقع دیا جائے۔
شیری رحمان کے مطابق ایل اے 16 کے پولنگ اسٹیشنز 119 اور 120 پر پیپلز پارٹی کے پولنگ ایجنٹس کو داخلے سے روکنا انتخابی شفافیت پر سنگین سوال ہے۔
انہوں نے مطالبہ کیا کہ مذکورہ پولنگ اسٹیشنز کے پریذائیڈنگ افسران سے پیپلز پارٹی کے ایجنٹس کو روکنے کی وضاحت طلب کی جائے۔
پیپلز پارٹی کی نائب صدر نے کہا کہ ایل اے 15 کے پولنگ اسٹیشن نمبر 158 سے پیپلز پارٹی کے پولنگ ایجنٹ کو باہر نکالنے کا بھی فوری نوٹس لیا جائے۔
ان کا کہنا تھا کہ پولنگ ایجنٹس کو انتخابی عمل کی نگرانی سے روکنا شفاف انتخابات کے منافی ہے، الیکشن کمیشن کو معاملے میں فوری مداخلت کرنی چاہیے۔
شیری رحمان نے مطالبہ کیا کہ پولنگ عملے یا انتخابی سامان کی کمی کی صورت میں فوری طور پر متبادل انتظام کیا جائے تاکہ ووٹرز کو کسی مشکل کا سامنا نہ کرنا پڑے۔
یہ بھی پڑھیں: آزاد کشمیر انتخابات کا تیسرا مرحلہ، باغ اور حویلی کہوٹہ میں پولنگ
انہوں نے کہا کہ انتخابی عمل میں کسی بھی رکاوٹ یا بے ضابطگی کو نظرانداز نہیں کیا جاسکتا، الیکشن کمیشن فوری طور پر شکایات کا ازالہ کرے۔
شیری رحمان نے مطالبہ کیا ہے کہ آزاد کشمیر کے تمام پولنگ اسٹیشنز پر قانون کے مطابق آزادانہ، شفاف اور بلا رکاوٹ پولنگ یقینی بنائی جائے اور ووٹرز کو کسی قسم کی دشواری کا سامنا نہ کرنا پڑے۔
