پونچھ ( پاک ترک نیوز) الیکشن کمیشن آزاد جموں و کشمیر نے تیسرے مرحلے کے انتخابات کے شیڈول میں تبدیلی کرتے ہوئے ضلع پونچھ اور ضلع پلندری (سدھنوتی) میں 10 اگست کو ہونے والی پولنگ ملتوی کر دی ہے۔
ترجمان الیکشن کمیشن کے مطابق اب 10 اگست کو صرف ضلع باغ کی تین اور ضلع حویلی کی ایک نشست پر پولنگ ہوگی، جبکہ سات نشستوں پر انتخابات کی نئی تاریخ کا اعلان بعد میں کیا جائے گا۔
الیکشن کمیشن کا کہنا ہے کہ سیکرٹری داخلہ کی رپورٹ کے مطابق پونچھ اور سدھنوتی میں امن و امان کی صورتحال پر تحفظات سامنے آئے، جس کے باعث ان اضلاع کے انتخابی حلقوں میں پولنگ مؤخر کرنے کا فیصلہ کیا گیا۔
ترجمان کے مطابق ضلع باغ کے تین انتخابی حلقوں اور ضلع حویلی کے ایک انتخابی حلقے میں 10 اگست کو پہلے سے طے شدہ شیڈول کے مطابق پولنگ ہوگی۔
یہ بھی پڑھیں: پنجاب میں ای چالان سسٹم کا دائرہ وسیع ،چکوال میں بھی خودکار جرمانے شروع
الیکشن کمیشن نے مزید بتایا کہ انتخابات ملتوی کرنے کا فیصلہ بعض سیاسی شخصیات اور انتخابی امیدواروں کی جانب سے موصول ہونے والی درخواستوں اور سیکیورٹی صورتحال کا جائزہ لینے کے بعد کیا گیا ہے۔
الیکشن کمیشن کا کہنا ہے کہ ملتوی کی گئی سات نشستوں پر پولنگ کی نئی تاریخ کا اعلان مناسب وقت پر کیا جائے گا۔
