رمضان سے پہلے مہنگائی بم گرا دیا گیا، حکومت نے پیٹرول اور ڈیزل مہنگا کردیا

اسلام آباد: (پاک ترک نیوز)وفاقی حکومت نے مہنگائی کے ستائے عوام پر ایک اور بوجھ ڈال دیا اور پیٹرولیم مصنوعات کی قیمتوں میں نمایاں اضافہ کر دیا ہے۔
پیٹرولیم ڈویژن کی جانب سے جاری کردہ اعلامیے کے مطابق نئی قیمتوں کا اطلاق آئندہ پندرہ روز کے لیے ہوگا۔اوگرا کی سفارشات کی روشنی میں پیٹرول کی قیمت میں 5 روپے فی لیٹر اضافہ کیا گیا ہے جس کے بعد نئی قیمت 258 روپے 17 پیسے ہو گئی ہے، جبکہ اس سے قبل پیٹرول 253 روپے 17 پیسے فی لیٹر فروخت ہو رہا تھا۔
اسی طرح ہائی اسپیڈ ڈیزل بھی مہنگا کر دیا گیا ہے اور اس کی قیمت میں 7 روپے 32 پیسے فی لیٹر اضافہ کیا گیا ہے۔ اضافے کے بعد ڈیزل کی نئی قیمت 275 روپے 70 پیسے فی لیٹر مقرر ہو گئی ہے، جو پہلے 268 روپے 38 پیسے تھی۔
حکومتی فیصلے کے بعد ٹرانسپورٹ کے کرایوں اور اشیائے ضروریہ کی قیمتوں میں مزید اضافے کا خدشہ ظاہر کیا جا رہا ہے، جبکہ یہ اضافہ ایسے وقت میں کیا گیا ہے جب رمضان المبارک کی آمد قریب ہے اور شہری پہلے ہی مہنگائی سے پریشان ہیں۔