اسلام آباد ( پاک ترک نیوز) بجلی صارفین کے لیے ایک اور بری خبر، اگست کے بجلی بلوں میں مجموعی طور پر 9 ارب 80 کروڑ روپے کا اضافی بوجھ منتقل کردیا گیا۔ نیپرا نے جون میں استعمال ہونے والی بجلی کے لیے فی یونٹ 75 پیسے فیول کاسٹ ایڈجسٹمنٹ کی منظوری دے دی۔
نیشنل الیکٹرک پاور ریگولیٹری اتھارٹی، نیپرا نے جون 2026 کی فیول کاسٹ ایڈجسٹمنٹ کی مد میں بجلی کی قیمت میں 75 پیسے فی یونٹ اضافے کی منظوری دی ہے
نیپرا کے مطابق جون کی مثبت فیول کاسٹ ایڈجسٹمنٹ 0.7503 روپے فی کلو واٹ آور مقرر کی گئی ہے، جس کی وصولی صارفین سے اگست 2026 کے بجلی بلوں میں کی جائے گی۔
نیپرا نے بجلی کی تقسیم کار کمپنیوں کی جانب سے فی یونٹ ایک روپے 20 پیسے اضافے کی درخواست کی تھی، تاہم ریگولیٹر نے اس میں نمایاں کمی کرتے ہوئے 75 پیسے فی یونٹ اضافے کی منظوری دی۔
اس اضافے سے اگست کے بلوں میں صارفین پر مجموعی طور پر تقریباً 9 ارب 80 کروڑ روپے کا اضافی مالی بوجھ پڑے گا۔
جون کی فیول کاسٹ ایڈجسٹمنٹ کا اطلاق کے الیکٹرک اور سابق واپڈا نظام سے الگ ہونے والی تمام ڈسکوز کے صارفین پر ہوگا۔
نیپرا کے مطابق ایڈجسٹمنٹ تمام متعلقہ صارفین کیٹیگریز پر لاگو ہوگی، جن میں اضافی بجلی استعمال کرنے والے صارفین کے لیے جاری انکریمنٹل کنزمپشن پیکیج کے صارفین بھی شامل ہیں۔
تاہم لائف لائن صارفین، الیکٹرک وہیکل چارجنگ اسٹیشنز اور پری پیڈ بجلی صارفین کو اس اضافے سے مستثنیٰ قرار دیا گیا ہے۔
ڈسکوز اور کے الیکٹرک کو ہدایت کی گئی ہے کہ جون کی فیول کاسٹ ایڈجسٹمنٹ اگست کے بلنگ سائیکل میں صارفین کے بجلی بلوں میں شامل کی جائے۔
نیپرا کے مطابق فیول کاسٹ ایڈجسٹمنٹ کا جائزہ ہر ماہ لیا جاتا ہے اور ملک بھر میں نافذ ٹیرف نظام کے تحت اس کا مالی اثر عموماً ایک ماہ کے بل میں صارفین کو منتقل کیا جاتا ہے۔
یہ بھی پڑھیں: ہوٹلز، ریسٹورنٹس اور میرج ہالز میں کچی رسیدوں کے اجراء پر پابندی
جولائی میں صارفین سے 34 پیسے فی یونٹ فیول کاسٹ ایڈجسٹمنٹ وصول کی گئی تھی، جبکہ اگست کے لیے یہ شرح بڑھ کر 75 پیسے فی یونٹ ہوگئی ہے۔
نیپرا کی جانب سے جون کی فیول کاسٹ ایڈجسٹمنٹ کی منظوری کے بعد اگست کے بجلی بلوں میں صارفین کو فی یونٹ 75 پیسے اضافی ادا کرنا ہوں گے، تاہم لائف لائن صارفین اور بعض دیگر کیٹیگریز کو اس اضافے سے استثنیٰ حاصل رہے گا۔
