اسلام آباد ( پاک ترک نیوز) ریسٹورنٹس، ہوٹلز، کافی شاپس اور میرج ہالز میں ٹیکس ادائیگی میں مبینہ ہیر پھیر روکنے کے لیے پنجاب ریونیو اتھارٹی نے بڑا فیصلہ کرلیا۔ صوبہ بھر میں کچی رسیدوں کے اجراء پر مکمل پابندی عائد کردی گئی، تمام متعلقہ کاروباروں کے لیے ای آئی ایم ایس کے ذریعے رسید جاری کرنا لازمی قرار دے دیا گیا۔
پنجاب ریونیو اتھارٹی نے صوبے بھر میں ہوٹلز، ریسٹورنٹس، کافی شاپس اور میرج ہالز میں ٹیکس وصولی کے نظام کو مزید مؤثر بنانے کے لیے کچی رسیدوں کے اجرا پر پابندی عائد کردی ہے۔پی آر اے کی جانب سے نوٹیفکیشن بھی جاری کردیا گیا ہے، جس کے مطابق تمام متعلقہ کاروباروں کے لیے ای آئی ایم ایس کے نظام کا نفاذ لازمی ہوگا۔
ترجمان پنجاب ریونیو اتھارٹی کے مطابق ای آئی ایم ایس کے تحت رسید جاری نہ کرنے والے کاروباروں کو 4 لاکھ سے 10 لاکھ روپے تک جرمانہ عائد کیا جائے گا۔قوانین کی مسلسل خلاف ورزی کرنے والے کاروباری مراکز کو ایک ماہ تک سیل بھی کیا جاسکے گا۔
ترجمان کے مطابق کارِ سرکار میں مداخلت، سیلز ریکارڈ میں خردبرد یا ریکارڈ فراہم نہ کرنے کی صورت میں بھی سخت قانونی کارروائی عمل میں لائی جائے گی۔
صارفین کو کچن آرڈر سلپس، غیر ادا شدہ بل یا ایسی دیگر رسیدیں جاری کرنے پر بھی مکمل پابندی ہوگی جنہیں باقاعدہ ٹیکس رسید کے متبادل کے طور پر استعمال کیا جاتا ہے۔
نئے نظام کے تحت صارف کو ایسی باقاعدہ رسید جاری کرنا لازمی ہوگا جس پر کاروبار کا نام، مکمل پتہ، رسید نمبر اور پنجاب ریونیو اتھارٹی کا کیو آر کوڈ درج ہو۔
پی آر اے کے مطابق اس اقدام کا مقصد کاروباری لین دین کو دستاویزی بنانا، ٹیکس چوری کی روک تھام اور صوبائی محصولات میں شفافیت لانا ہے۔
یہ بھی پڑھیں: مونال ریسٹورنٹ گرانے کا فیصلہ کالعدم قرار
چیئرمین پنجاب ریونیو اتھارٹی معظم اقبال سپرا کی ہدایت پر تمام اضلاع کے کمشنرز نے متعلقہ نوٹیفکیشنز جاری کردیئے ہیں۔
انفورسمنٹ افسران کو ہدایت کی گئی ہے کہ قوانین کی خلاف ورزی کی صورت میں فوری کارروائی یقینی بنائی جائے اور کاروباری مراکز میں رسیدوں کے نظام کی مؤثر نگرانی کی جائے۔
