لاہور(پاک ترک نیوز) وزیراعلیٰ پنجاب مریم نواز شریف سے قائم مقام امریکی سفیر نیٹلی اے بیکر نے ملاقات کی، جس میں پنجاب میں تعلیم کے فروغ، سیکیورٹی، سرمایہ کاری اور دیگر اہم امور پر تبادلہ خیال کیا گیا۔
ملاقات کے دوران سیکیورٹی، مصنوعی ذہانت، ڈیجیٹل اثاثوں اور توانائی کے شعبوں میں تعاون بڑھانے پر اتفاق کیا گیا۔
قائم مقام امریکی سفیر نے خواتین کو بااختیار بنانے کے لیے وزیراعلیٰ مریم نواز شریف کے اقدامات کو سراہا، جبکہ پنجاب میں سیلاب اور سموگ سے نمٹنے کے لیے امریکی ماہرین کی خدمات حاصل کرنے پر بھی اتفاق ہوا۔ملاقات میں لاہور میں پنجاب یو ایس بزنس اینڈ انویسٹمنٹ فورم کے انعقاد کی تجویز پر بھی غور کیا گیا۔
قائم مقام امریکی سفیر نیٹلی بیکر نے لاہور میں بسنت فیسٹیول کے انعقاد کو سراہتے ہوئے محفوظ بسنت کے لیے پنجاب حکومت کے اقدامات کی تعریف کی۔
نیٹلی بیکر کا کہنا تھا کہ پاکستان انہیں بہت پسند ہے، خصوصاً پنجاب اور لاہور کے لوگ زندہ دل ہیں۔
وزیراعلیٰ مریم نواز نے کہا کہ آئندہ سال بسنت میلے کو مزید توسیع دی جائے گی، جبکہ پنجاب میں خواتین کو بااختیار بنانے کے لیے قانونی اور عملی اقدامات کیے جارہے ہیں۔
مریم نواز کے مطابق پنجاب میں ترقی اور ماحولیاتی تبدیلیوں سے نمٹنے کے لیے نئی پالیسیاں بنائی جارہی ہیں۔ امریکہ میں مقیم 10 لاکھ پنجاب کے اوورسیز پاکستانی ملک کا قیمتی اثاثہ ہیں۔
وزیراعلیٰ نے کہا کہ مون سون سے قبل پیشگی اقدامات اور ڈسٹرکٹ واساز کے قیام سے بارشی پانی کے فوری نکاس کو ممکن بنایا گیا ہے۔
یہ بھی پڑھیں: یو ای ٹی لاہور کی دوسری میرٹ لسٹ، آج داخلے کی آخری تاریخ
مریم نواز کا کہنا تھا کہ پنجاب بدل رہا ہے، پنجاب کے شہر اور دیہات ری فارم ہورہے ہیں۔پاکستان کی پہلی خاتون وزیراعلیٰ ہونے کی حیثیت سے خواتین کو بااختیار بنانے کو محض علامتی نہیں بلکہ عملی شکل دی۔ خواتین کی آمدورفت میں آسانی کے لیے الیکٹرک اسکوٹیز اور الیکٹروبس سروس شروع کی گئی ہے، جبکہ خواتین کو مالی خودمختاری کی راہ پر گامزن کرنے کے لیے چھوٹے کاروبار کے لیے بلاسود قرضے بھی دیے جارہے ہیں۔
مریم نواز کے مطابق خواتین کے تحفظ کے لیے ڈائریکٹ پنک بٹن اور ورچوئل پولیس اسٹیشن جیسے اقدامات بھی کیے گئے ہیں۔
