لاہور( پاک ترک نیوز) گرمی سے بچنے کے لیے اے سی چلا رہے ہیں تو ذرا احتیاط کیجیے۔۔۔ یہی ٹھنڈی ہوا آپ کی جلد، آنکھوں، سانس اور جسم کے لیے خاموش خطرہ بھی بن سکتی ہے۔۔ ماہرینِ صحت نے خبردار کر دیا ہے کہ ایئر کنڈیشنر کے سامنے طویل وقت گزارنا، خاص طور پر دمے اور الرجی کے مریضوں کے لیے نقصان دہ ثابت ہو سکتا ہے۔ آخر اس سے بچنے کا طریقہ کیا ہے؟ دیکھیے یہ خصوصی رپورٹ۔
شدید گرمی میں ایئر کنڈیشنر کسی نعمت سے کم نہیں۔۔۔ مگر ماہرینِ صحت کا کہنا ہے کہ اگر احتیاط نہ کی جائے تو یہی ٹھنڈی ہوا کئی بیماریوں کا سبب بھی بن سکتی ہے۔
ماہرین کے مطابق اے سی کمرے کی نمی کم کر دیتا ہے جس سے جلد اپنی قدرتی نمی کھو بیٹھتی ہے۔۔ نتیجتاً جلد خشک، کھردری اور بے رونق ہو سکتی ہے۔۔ ہونٹ پھٹنے لگتے ہیں جبکہ حساس جلد رکھنے والے افراد میں ایگزیما جیسے مسائل بھی شدت اختیار کر سکتے ہیں۔
صرف جلد ہی نہیں بلکہ آنکھیں بھی متاثر ہوتی ہیں۔۔۔ خشک ہوا آنکھوں میں جلن، خارش، چبھن اور خشکی پیدا کر سکتی ہے۔۔۔ خاص طور پر کانٹیکٹ لینس استعمال کرنے والوں کو زیادہ احتیاط کی ضرورت ہے۔۔۔ بعض افراد کو عارضی طور پر دھندلا دکھائی دینے کی شکایت بھی ہو سکتی ہے۔
ماہرین خبردار کرتے ہیں کہ اگر ایئر کنڈیشنر کے فلٹرز کی باقاعدہ صفائی نہ کی جائے تو ان میں جمع گرد، پولن اور پھپھوندی کے ذرات ہوا میں شامل ہو کر سانس کے ذریعے جسم میں داخل ہو سکتے ہیں۔۔۔ یہ ذرات دمے کے دورے، الرجی اور دیگر سانس کی بیماریوں کا خطرہ بڑھا دیتے ہیں۔
یہ بھی پڑھیں: لاہور میں تیز بارش سے نشیبی علاقے ڈوب گئے
مسلسل اے سی والے ماحول میں رہنے سے جسم میں پانی کی کمی بھی پیدا ہو سکتی ہے۔۔۔ جس کے باعث سر درد، پٹھوں میں کھنچاؤ، جسمانی تھکن اور اکڑاؤ محسوس ہو سکتا ہے۔۔۔ خاص طور پر دفاتر، ہوٹلوں یا ایسے مقامات پر جہاں لوگ کئی گھنٹے اے سی میں گزارتے ہیں۔
ماہرین اس سے بچنے کے لیے چند آسان احتیاطی تدابیر بھی بتاتے ہیں۔۔۔ دن بھر مناسب مقدار میں پانی پیتے رہیں۔۔۔ اے سی والے ماحول میں جانے سے پہلے جلد پر ایسا موئسچرائزر لگائیں جس میں گلیسرین یا ہائیلورونک ایسڈ موجود ہو۔۔۔ اگر ممکن ہو تو کمرے میں ہیومیڈیفائر یا گھر کے اندر پودے رکھیں تاکہ ہوا میں نمی برقرار رہے۔۔۔ اور سب سے اہم بات، اے سی کے فلٹرز کی باقاعدگی سے صفائی اور سروس ضرور کروائیں۔
ماہرین کا کہنا ہے کہ تھوڑی سی احتیاط آپ کو کئی مسائل سے محفوظ رکھ سکتی ہے۔۔۔ خاص طور پر دمے، الرجی اور سانس کی بیماریوں میں مبتلا افراد کو اے سی کا استعمال سوچ سمجھ کر کرنا چاہیے۔
گرمی سے بچنے کے لیے اے سی ضرور استعمال کریں مگر یاد رکھیں، ٹھنڈی ہوا اسی وقت فائدہ دیتی ہے جب اس کے ساتھ احتیاط بھی کی جائے۔۔۔ ورنہ یہی راحت خاموشی سے آپ کی جلد، آنکھوں اور پھیپھڑوں کو نقصان پہنچا سکتی ہے۔۔۔ اس لیے اے سی چلائیں، لیکن اپنی صحت کا خیال رکھنا ہرگز نہ بھولیں۔
