اسلام آباد ( پاک ترک نیوز) صدرِ مملکت آصف علی زرداری اور وزیراعظم محمد شہباز شریف نے یومِ سیاہ کشمیر کے موقع پر کشمیری عوام سے یکجہتی کا اظہار کرتے ہوئے جدوجہدِ آزادی میں جانوں کا نذرانہ پیش کرنے والے کشمیری مردوں، خواتین اور بچوں کو خراجِ عقیدت پیش کیا ہے۔صدرِ مملکت آصف علی زرداری نے اپنے پیغام میں عالمی برادری پر زور دیا کہ وہ جموں و کشمیر کے تنازع کے حل کے لیے اپنا کردار ادا کرے۔ انہوں نے کہا کہ یومِ سیاہ کشمیری عوام کی جدوجہد کی بھرپور حمایت کے اعادے کا دن ہے۔ کشمیری عوام بدستور پابندیوں، تنازعات اور بنیادی حقوق سے محرومی کا سامنا کر رہے ہیں۔
صدر زرداری نے واضح کیا کہ پاکستان کشمیری عوام کی اخلاقی، سفارتی اور سیاسی حمایت جاری رکھے گا۔وزیراعظم محمد شہباز شریف نے اپنے پیغام میں کہا کہ 27 اکتوبر جموں و کشمیر کی تاریخ کے ایک المناک باب کی یاد دلاتا ہے۔ ان کے مطابق 79 برس گزرنے کے باوجود کشمیری عوام اپنے حقِ خودارادیت سے محروم ہیں۔وزیراعظم نے کہا کہ کشمیری عوام کی جرات، حوصلہ اور ثابت قدمی ان کی جدوجہد کا واضح ثبوت ہے۔ مسئلہ کشمیر کا حل اقوام متحدہ کی سلامتی کونسل کی قراردادوں کے مطابق ہونا چاہیے، کیونکہ اس تنازع کے منصفانہ اور پُرامن حل کے بغیر جنوبی ایشیا میں پائیدار امن کا قیام ممکن نہیں۔
شہباز شریف نے بھی اس عزم کا اعادہ کیا کہ پاکستان کشمیری عوام کے حقِ خودارادیت کی حمایت اور ان کے لیے اخلاقی، سفارتی اور سیاسی کوششیں جاری رکھے گا۔
