لاہور(پاک ترک نیوز) حکومت پنجاب نے سکیورٹی خدشات کے پیش نظر صوبے بھر میں کھلی فضا میں ڈرون اڑانے پر 30 روز کے لیے پابندی عائد کردی۔محکمہ داخلہ پنجاب نے ضابطہ فوجداری کی دفعہ 144 کے تحت پابندی کا نوٹیفکیشن جاری کردیا، جس کے مطابق کھلے مقامات پر ڈرون اڑانے کی اجازت نہیں ہوگی۔نوٹیفکیشن کے مطابق ہالز اور مارکیز کے اندر تقریبات کی کوریج کے لیے چھوٹے ڈرونز کا محدود استعمال کیا جاسکے گا، تاہم اندرونی تقریبات میں ڈرون کے محفوظ استعمال کی ذمہ داری منتظمین پر عائد ہوگی۔
انٹیلی جنس اور قانون نافذ کرنے والے اداروں کو ڈرون کے استعمال پر عائد پابندی سے مستثنیٰ قرار دیا گیا ہے۔محکمہ داخلہ کے مطابق زرعی، آبپاشی اور تحقیقی مقاصد کے لیے ڈرون استعمال کرنے کی صورت میں ضلعی سطح پر قائم محفوظ ڈرون استعمال کمیٹی سے تحریری اجازت لینا لازمی ہوگا۔کمیٹی کی تحریری اجازت حاصل کرنے کے بعد متعلقہ مقاصد کے لیے ڈرون کا استعمال پابندی سے مستثنیٰ ہوگا۔
یہ بھی پڑھیں: مری میں اسکول وین حادثے کا شکار، 11 بچے اور ڈرائیور زخمی
محکمہ داخلہ کے مطابق پابندی کا مقصد عوام کے تحفظ، امن و امان کے قیام اور املاک کی حفاظت کو یقینی بنانا ہے۔سیکریٹری داخلہ پنجاب نے ضابطہ فوجداری 1898 کی دفعہ 144 کی شق 6 کے تحت ڈرون کے استعمال پر پابندی عائد کی ہے۔پنجاب بھر کی انتظامیہ اور پولیس کو پابندی پر من و عن عمل درآمد یقینی بنانے کی ہدایت کردی گئی ہے۔
