استنبول ( پاک ترک نیوز) وزیراعظم شہباز شریف کی ترکیہ کے شہر انطالیہ میں سوڈان کی عبوری خودمختار کونسل کے صدر جنرل عبدالفتاح البرہان سے ملاقات ہوئی، جس میں دوطرفہ تعلقات، علاقائی صورتحال اور عالمی امور پر گفتگو کی گئی۔
ملاقات کوپ 31 کے اعلیٰ سطحی اجلاس کے موقع پر ہوئی۔ وزیراعظم نے پاکستان اور سوڈان کے درمیان دیرینہ برادرانہ تعلقات کے عزم کا اعادہ کرتے ہوئے کہا کہ پاکستان سوڈان کی خودمختاری، اتحاد اور علاقائی سالمیت کی غیر متزلزل حمایت کرتا ہے۔شہباز شریف نے موجودہ چیلنجز کے تناظر میں سوڈان کے عوام کے ساتھ یکجہتی کا اظہار بھی کیا۔ دونوں رہنماؤں نے مختلف شعبوں میں دوطرفہ تعلقات کو مزید مستحکم بنانے کے امکانات پر تبادلہ خیال کیا۔
یہ بھی پڑھیں: اسرائیل کا ایک ہزار پاؤنڈ وزنی وارہیڈ رکھنے والا نیا کروز میزائل متعارف
ملاقات میں موسمیاتی تبدیلی کے چیلنجز بھی زیرِ بحث آئے۔ دونوں رہنماؤں نے اتفاق کیا کہ موسمیاتی تبدیلی کے ترقی پذیر ممالک پر اثرات سے نمٹنے کے لیے عالمی تعاون اور مشترکہ کوششیں ناگزیر ہیں۔وزیراعظم شہباز شریف اور جنرل عبدالفتاح البرہان نے کثیرالجہتی فورمز پر قریبی رابطہ کاری اور باہمی تعاون جاری رکھنے کے عزم کا بھی اعادہ کیا۔
