لاہور: (پاک ترک نیوز)عوام پاکستان پارٹی کے سینئر رہنما زعیم قادری آج صبح تقریباً چار بجے لاہور کے ایک نجی ہسپتال میں انتقال کر گئے۔
مرحوم طویل عرصے سے عارضۂ قلب میں مبتلا تھے اور چند روز قبل ہی ڈیفنس کے ایک نجی ہسپتال میں داخل کیے گئے تھے، لیکن حالت بگڑنے کے بعد جانبر نہ ہو سکے۔
مرحوم کے اہلِ خانہ کے مطابق ان کی نمازِ جنازہ آج شام بعد از نمازِ مغرب تقریباً چھ بجے لارنس روڈ لاہور میں ادا کی جائے گی، جس میں سیاسی و سماجی شخصیات کی کثیر تعداد شرکت متوقع ہے۔
زعیم قادری پنجاب کے فعال سیاسی رہنماؤں میں شمار کیے جاتے تھے اور عوام پاکستان پارٹی میں پنجاب کے ترجمان کے فرائض انجام دے رہے تھے۔
اس سے قبل وہ پاکستان مسلم لیگ (ن) کے پلیٹ فارم سے رکنِ پنجاب اسمبلی منتخب ہو چکے تھے اور حکومت کے ترجمان کے طور پر بھی خدمات انجام دے چکے تھے۔ان کے انتقال پر سیاسی اور سماجی حلقوں میں گہرے دکھ اور افسوس کا اظہار کیا گیا ہے، جبکہ مختلف سیاسی رہنماؤں نے مرحوم کی خدمات اور صوبائی سیاست میں ان کے کردار کو خراجِ عقیدت پیش کیا ہے۔
زعیم قادری کو ان کی دیانتداری، عوامی مسائل کے حل میں دلچسپی اور سیاسی سچائی کے لیے یاد کیا جائے گا۔ان کی وفات سے صوبائی سیاست میں ایک خالی پن پیدا ہوا ہے، اور عوام پاکستان پارٹی سمیت دیگر سیاسی حلقوں میں سوگ کی کیفیت ہے۔ سیاسی مبصرین کے مطابق زعیم قادری کی سیاست اور عوامی خدمات ایک دیرپا یادگار کے طور پر رہیں گی۔
سینئر سیاستدان زعیم قادری انتقال کر گئے ، اِنّا لِلّهِ وَاِنّا اِلَيْهِ رَاجِعُون
