شب قدر ( پاک ترک نیوز) وفاقی وزیر داخلہ محسن نقوی نے چارسدہ میں فیڈرل کانسٹیبلری ٹریننگ سینٹر شب قدر کا تفصیلی دورہ کیا اور فورس کی آپریشنل تیاریوں اور پیشہ وارانہ تربیت کا جائزہ لیا ۔
وزیر داخلہ محسن نقوی نے وزارت داخلہ کے بیرون ملک سے آئے سٹیٹ گیسٹ کے لیے سپیشل پروٹیکشن ونگ اور اینٹی رائٹ ونگ کی تربیتی سرگرمیوں کا معائنہ کیا۔
وزیر داخلہ محسن نقوی نے اہلکاروں کی جدید خطوط پر تربیت کے معیار کو سراہا ،کہا سپیشل پروٹیکشن ونگ کو ترقی یافتہ ممالک کی طرز پر جدید و منظم فورس بنایا جا رہا ہے۔
محسن نقوی نے کہا غیر ملکی مہمانوں کو بین الاقوامی معیار کی سکیورٹی فراہم کرنا سپیشل پروٹیکشن ونگ کی ذمہ داری ہو گی۔سپیشل پروٹیکشن ونگ کی ٹریننگ پر خصوصی توجہ دی جا رہی ہے۔
وزیر داخلہ نے مزید کہا اہلکاروں کی غیر ملکی انسٹرکٹر سے ٹریننگ کا بھی انتظام کیا گیا ہے اور بیرون ملک بھی بھیجا جائے گا۔ وفاقی وزیرداخلہ محسن نقوی کی تمام اہلکاروں کو فزیکل فٹنس،جدید اسلحہ کی تربیت اور ڈرائیونگ پر خصوصی توجہ دینے کی ہدایت کی ہے۔
محسن نقوی نے کہا تعلیمی قابلیت بڑھانے کے ساتھ اہلکاروں کو بین الاقومی زبانیں بھی سیکھائی جا رہی ہیں ۔وزیرداخلہ نے جدید اینٹی رائٹ آلات خریدنے کی ہدایت کر دی ہے ۔
محسن نقوی نے کہا ملک بھر میں قیام امن اور دہشت گردی کے خلاف جنگ میں فیڈرل کانسٹیبلری کا کردار انتہائی اہم ہے۔ مستقبل کے سکیورٹی چیلنجز سے نمٹنے کیلئے فیڈرل کانسٹیبلری کو ایک فعال فورس میں ڈھالا جا رہا ہے۔
وزیر داخلہ محسن نقوی نے بیرکس کا دورہ کیا اور زیر تربیت اہلکاروں سے کھانے، دیگر سہولتوں اور مسائل کے متعلق دریافت کیا۔وزیر داخلہ نے بیرکس میں بلا تعطل بجلی کی فراہمی یقینی بنانے کیلئے موقع پر ہی احکامات دیئے ۔
وزیر داخلہ نے کہاسینٹر میں جم اور سوئمنگ پول کی تعمیر بھی شروع کی جائے۔ آئی جی فیڈرل کانسٹیبلری نذیر احمد گاڑا نے اہلکاروں کی تربیت کے بارے بریفنگ دی ۔
بریفنگ میں بتایا گیا کہ زیر تربیت اہلکاروں میں تمام صوبوں بشمول آزاد کشمیر و گلگت بلتستان کو نمائندگی حاصل ہے، تربیتی پروگرام میں پہلی دفعہ 35 خواتین اہلکار بھی شامل ہیں۔ ڈی آئی جی فیڈرل کانسٹیبلری، ڈی او ایف سی, ڈپٹی کمشنر چارسدہ، ڈی پی او چارسدہ اور متعلقہ اعلیٰ افسران بھی اس موقع پر موجود تھے ۔
