لندن(پاک ترک نیوز ) پاکستانی وزارت خارجہ کے ڈیمارش پر ترجمان برطانوی ہائی کمیشن نے بھی اپنے ردعمل کا اظہار کر دیا۔
ترجمان برطانوی ہائی کمیشن نے کہا کہ برطانیہ میں پولیس اور پراسیکیوشن حکومت سے آزاد ہو کر کام کرتے ہیں، اگر کسی غیر ملکی حکومت کو جرم کا شبہ ہو تو شواہد پولیس لائژن کو دیے جائیں۔
ترجمان برطانوی ہائی کمیشن نے مزید کہا کہ متعلقہ مواد برطانوی پولیس کی جانب سے قانون کے مطابق جانچا جائے گا، قانون شکنی کا مواد سامنے آنے پر فوجداری تحقیقات شروع ہو سکتی ہیں، ہر معاملہ برطانوی قانون کے تحت نمٹایا جاتا ہے۔
واضح رہے کہ پاکستانی وزارتِ خارجہ کی جانب سے ڈیمارش برطانوی شہر بریڈ فورڈ میں پاکستانی قونصلیٹ کے سامنے احتجاج کے حوالے سے جاری کیا گیا تھا، برطانیہ میں پاکستان کی ایک سیاسی جماعت کے آفیشل اکاؤنٹ کو مظاہرین جمع کرنے کیلئے استعمال کیا گیا۔
احتجاج کے دوران مظاہرین نے چیف آف ڈیفنس فورسز کیخلاف انتہائی اشتعال انگیز اور قابل اعتراض زبان استعمال کی، احتجاج کے دوران فیلڈ مارشل کو جان سے مارنے کی دھمکیاں بھی دی گئیں اور کہا گیا کہ اُن کو ایک کار بم دھماکے میں قتل کر دیا جائے گا۔
وزارتِ خارجہ کا کہنا تھا کہ حکومت پاکستان نے برطانیہ کی سرزمین سے دی جانے والی دھمکیوں کا سخت نوٹس لیا ہے، برطانوی حکومت پر زور دیتے ہیں کہ وہ اپنی سرزمین پاکستان کو غیر مستحکم کرنے کیلئے استعمال نہ ہونے دے۔
قانون شکنی کے شواہد دیں تو فوجداری کارروائی شروع ہو سکتی ہے: برطانوی ہائی کمیشن
