کراچی ( پاک ترک نیوز) اسٹیٹ بینک آف پاکستان نے وزیرِاعظم اپنا گھر پروگرام کے تحت فنانسنگ کے دائرہ کار کو مزید وسعت دے دی ہے، جس کے بعد اوورسیز پاکستانیوں کو بھی اس اسکیم سے فائدہ اٹھانے کی اجازت مل گئی۔
اسٹیٹ بینک کی جانب سے تمام بینکوں، ہاؤس بلڈنگ فنانس کمپنی اور مائیکرو فنانس بینکوں کے صدور و چیف ایگزیکٹو افسران کو سرکلر جاری کر دیا گیا ،سرکلر کے مطابق حکومت نے پروگرام کے نفاذ کے لیے نئی سہولتوں کی منظوری دے دی ہے۔
نظرثانی شدہ فریم ورک کے تحت نائیکوپ یا پی او سی کارڈ رکھنے والے اوورسیز اور نان ریذیڈنٹ پاکستانی اب اپنا گھر پروگرام کے تحت ہاؤسنگ فنانس حاصل کر سکیں گے۔
پروگرام میں شریک مالیاتی اداروں کو سرکاری ملازمین کے لیے متعلقہ محکموں کے ذریعے اجتماعی بنیادوں پر فنانسنگ پراسیسنگ کی اجازت بھی دی گئی ہے۔
نئے فیصلے کے تحت نجی ہاؤسنگ ڈویلپرز کے زیرِ انتظام رہائشی منصوبوں کے لیے بھی اسکیم کے تحت فنانسنگ فراہم کی جا سکے گی، جس سے کم لاگت رہائشی منصوبوں کو فروغ ملنے کی توقع ہے۔
اسٹیٹ بینک کے مطابق پروگرام سے متعلق دیگر تمام شرائط اور ہدایات بدستور برقرار رہیں گی۔
