مظفر آباد ( پاک ترک نیوز) آزاد کشمیر میں کون بنائے گا حکومت ،فیصلے کی گھڑی قریب آ گئی ، قانون ساز اسمبلی کے پہلے مرحلے کے انتخابات کے لیے تمام تیاریاں مکمل کر لی گئی ہیں۔ میرپور ڈویژن کے تین اضلاع میں انتخابی مہم اپنے اختتام کو پہنچ گئی، جبکہ بیلٹ پیپرز اور دیگر انتخابی سامان کی ترسیل کا عمل بھی شروع ہو رہا ہے۔ سیکیورٹی کے سخت انتظامات کیے گئے ہیں اور لاکھوں ووٹرز کل اپنا حقِ رائے دہی استعمال کریں گے۔ رپورٹ دیکھیے۔
آزاد کشمیر قانون ساز اسمبلی کے پہلے مرحلے کے انتخابات کے لیے میرپور ڈویژن کے اضلاع میرپور، کوٹلی اور بھمبر میں انتخابی مہم رات بارہ بجے ختم ہو گئی۔ اب امیدواروں کی نظریں پولنگ ڈے پر مرکوز ہیں، جبکہ انتخابی سامان کی ترسیل آج سے متعلقہ حلقوں میں شروع کی جا رہی ہے۔
میرپور ڈویژن کے تیرہ انتخابی حلقوں میں رجسٹرڈ ووٹرز کی مجموعی تعداد چودہ لاکھ ایک ہزار چار سو انتالیس ہے، جن میں سات لاکھ پچیس ہزار ایک سو اٹھارہ مرد اور چھ لاکھ پچھتر ہزار چھ سو اٹھائیس خواتین ووٹرز شامل ہیں، جو اپنے ووٹ کے ذریعے عوامی نمائندوں کا انتخاب کریں گے۔
شفاف اور منظم پولنگ کے لیے میرپور ڈویژن میں مجموعی طور پر دو ہزار چار سو چون پولنگ اسٹیشن قائم کیے گئے ہیں۔ ضلع میرپور کے چار حلقوں میں پانچ سو ستانوے، ضلع کوٹلی کے چھ حلقوں میں ایک ہزار ایک سو سات، جبکہ ضلع بھمبر کے تین حلقوں میں چھ سو آٹھ پولنگ اسٹیشن قائم کیے گئے ہیں۔
انتخابی میدان میں سیاسی سرگرمیاں بھی عروج پر رہیں۔ تیرہ حلقوں میں مسلم لیگ (ن)، پاکستان پیپلز پارٹی، استحکام پاکستان پارٹی سمیت مختلف سیاسی جماعتوں اور آزاد امیدواروں کو ملا کر مجموعی طور پر دو سو چھیانوے امیدوار قسمت آزمائی کر رہے ہیں۔
سیکیورٹی کے حوالے سے انتظامیہ نے سخت اقدامات کیے ہیں۔ ایس پی خرم اقبال کے مطابق ضلع میرپور کی چار نشستوں پر انتخابات کے لیے پانچ ہزار سیکیورٹی اہلکار تعینات کیے جائیں گے تاکہ پولنگ کا عمل پرامن اور شفاف انداز میں مکمل ہو سکے۔
Read this too: نواز شریف کا وعدہ پورا،آزاد کشمیر کیلئے 10الیکٹرک بسوں کا تحفہ آزاد کشمیر پہنچ گیا
چیف الیکشن کمشنر آزاد کشمیر غلام مصطفیٰ مغل نے کہا ہے کہ انتخابات کی تمام تیاریاں مکمل کر لی گئی ہیں اور بیلٹ پیپرز سمیت تمام انتخابی سامان متعلقہ مقامات پر پہنچا دیا گیا ہے۔ ان کے مطابق پولنگ کے دوران فوج، پولیس، فرنٹیئر کور اور رینجرز سیکیورٹی کے فرائض انجام دیں گے۔
چیف الیکشن کمشنر نے ووٹرز سے اپیل کی ہے کہ وہ بلا خوف و خطر پولنگ اسٹیشن پہنچ کر اپنا حقِ رائے دہی استعمال کریں۔ انہوں نے واضح کیا کہ ووٹ ڈالنے کے لیے اصل قومی شناختی کارڈ لازمی ہوگا، تاہم اگر شناختی کارڈ کی مدت ختم ہو چکی ہو تو پرانا شناختی کارڈ دکھا کر بھی ووٹ ڈالا جا سکے گا۔
آزاد کشمیر قانون ساز اسمبلی کے پہلے مرحلے کے انتخابات کے لیے تمام انتظامات مکمل ہیں۔ اب فیصلہ ووٹرز کے ہاتھ میں ہے، جو اپنے حقِ رائے دہی کے ذریعے آئندہ پانچ برس کے لیے اپنے نمائندوں کا انتخاب کریں گے، جبکہ الیکشن کمیشن پرامن، شفاف اور غیر جانبدار انتخابات کے انعقاد کے لیے پُرعزم ہے۔
