حج 2026: سعودی ویزا بائیو میٹرک کی آخری تاریخ بڑھا دی گئی، وزارتِ مذہبی امور کی نئی ہدایات

اسلام آباد: (پاک ترک نیوز)وزارتِ مذہبی امور نے حج 2026 کے خواہشمند عازمین کے لیے اہم سہولت کا اعلان کرتے ہوئے سعودی ویزا کے بائیو میٹرک مرحلے کی مدت میں توسیع کر دی ہے، تاکہ زیادہ سے زیادہ افراد بروقت اپنی کارروائی مکمل کر سکیں۔
وزارت کے ترجمان کے مطابق اب عازمین 17 فروری تک سعودی ویزا بائیو میٹرک کا عمل مکمل کر سکتے ہیں۔ حکام نے واضح کیا ہے کہ مقررہ تاریخ کے بعد بائیو میٹرک مکمل نہ ہونے کی صورت میں حج ویزا جاری نہیں کیا جائے گا، کیونکہ یہ مرحلہ ویزا کے اجرا کے لیے لازمی قرار دیا گیا ہے۔
ترجمان نے بتایا کہ سہولت کے پیشِ نظر عازمین ایک مخصوص موبائل ایپ کے ذریعے گھر بیٹھے بھی بائیو میٹرک فراہم کر سکتے ہیں، جس سے وقت اور اخراجات کی بچت ممکن ہو گی۔ اس کے ساتھ ساتھ ملک کے چھ بڑے شہروں میں قائم سعودی تاشیرہ مراکز پر جا کر بھی یہ عمل مکمل کرایا جا سکتا ہے۔
وزارتِ مذہبی امور نے ہدایت کی ہے کہ بائیو میٹرک مکمل ہونے کے بعد حاصل ہونے والی رسید یا تصدیقی ای میل کو محفوظ رکھا جائے، تاکہ آئندہ کسی مرحلے پر ضرورت پڑنے کی صورت میں پیش کی جا سکے۔
حکام نے تمام عازمینِ حج سے اپیل کی ہے کہ آخری تاریخ کا انتظار کیے بغیر جلد از جلد بائیو میٹرک کا مرحلہ مکمل کریں، تاکہ حج ویزا کے اجرا میں کسی قسم کی رکاوٹ یا تاخیر سے بچا جا سکے۔