پی ایس ایل 11 کا ڈرافٹ تیار: 879 کھلاڑی رجسٹر، وارنر، اسمتھ اور افغان اسٹارز کی انٹری

لاہور: (پاک ترک نیوز)پاکستان سپر لیگ کے 11ویں ایڈیشن کی تیاریوں میں اہم مرحلہ مکمل ہو گیا ہے۔ پاکستان کرکٹ بورڈ نے تصدیق کی ہے کہ لیگ کے آئندہ سیزن کے لیے مقامی اور غیر ملکی مجموعی طور پر 879 کرکٹرز نے ڈرافٹ میں شمولیت کے لیے خود کو رجسٹر کروا لیا ہے، جبکہ پلیئر ڈرافٹ 11 فروری کو منعقد ہوگا۔
پی سی بی کے مطابق رجسٹرڈ کھلاڑیوں میں دنیا بھر کے نمایاں کرکٹ ممالک کے اسٹارز شامل ہیں، جن میں افغانستان، آسٹریلیا، نیوزی لینڈ، جنوبی افریقہ، انگلینڈ اور سری لنکا کے کھلاڑی خاص طور پر توجہ کا مرکز ہیں۔
تمام کھلاڑیوں نے لیگ کی مقررہ بیس پرائس کیٹیگریز کے تحت رجسٹریشن مکمل کی ہے۔سب سے مہنگی بیس پرائس، جو 4 کروڑ 20 لاکھ روپے مقرر کی گئی ہے، میں افغانستان کے فاسٹ بولر فضل حق فاروقی اور اسپنر مجیب الرحمٰن، آسٹریلیا کے سابق کپتان ڈیوڈ وارنر، نیوزی لینڈ کے ڈیرل مچل اور مائیکل بریسویل شامل ہیں۔
اسی کیٹیگری میں جنوبی افریقہ کے رائیلی روسو، انگلینڈ کے جیمز ونس اور سری لنکا کے آل راؤنڈر داسن شناکا نے بھی نام درج کرایا ہے۔
پاکستانی کھلاڑیوں میں فخر زمان، محمد رضوان، نسیم شاہ، حارث رؤف، محمد عامر، عماد وسیم، فہیم اشرف، سلمان علی آغا اور صاحبزادہ فرحان شامل ہیں، جن کی بیس پرائس مختلف کیٹیگریز میں 60 لاکھ سے لے کر 2 کروڑ 20 لاکھ روپے تک رکھی گئی ہے۔
ادھر لیگ کی نئی فرنچائزز نے ڈرافٹ سے قبل ہی بڑی پیش رفت کرتے ہوئے براہِ راست سائننگ کا آپشن استعمال کیا ہے۔ حیدرآباد فرنچائز نے آسٹریلوی بیٹر مارنس لبوشین کو اسکواڈ میں شامل کیا، جبکہ سیالکوٹ اسٹالینز نے اسٹار بلے باز اسٹیو اسمتھ سے معاہدہ کر لیا ہے۔
پی ایس ایل کے 11ویں سیزن میں لیگ کی تاریخ کی سب سے بڑی توسیع بھی دیکھنے میں آئے گی، جہاں ٹیموں کی تعداد 6 سے بڑھا کر 8 کر دی گئی ہے۔
حیدرآباد اور سیالکوٹ اسٹالینز پہلی بار پی ایس ایل میں شرکت کریں گی۔فرنچائزز کی ملکیت کے حوالے سے پی سی بی کے مطابق حیدرآباد ٹیم فواد سرور نے 1 ارب 75 کروڑ روپے کی بولی کے ذریعے حاصل کی، جبکہ سیالکوٹ اسٹالینز سب سے مہنگی فرنچائز ثابت ہوئی، جسے حمزہ مجید نے 1 ارب 85 کروڑ روپے میں خریدا۔پاکستان سپر لیگ کا 11واں ایڈیشن 26 مارچ سے شروع ہو کر 3 مئی تک جاری رہے گا، جس میں شائقین کو کرکٹ کے سنسنی خیز مقابلے دیکھنے کو ملیں گے۔