یومِ یکجہتی کشمیر: پاکستان کا دنیا کو کشمیری عوام سے غیر متزلزل اظہارِ یکجہتی کا پیغام

اسلام آباد: (پاک ترک نیوز)ملک بھر میں آج یومِ یکجہتی کشمیر قومی عزم اور بھرپور احساسِ یکجہتی کے ساتھ منایا جا رہا ہے، جس کا مقصد کشمیری عوام کی طویل جدوجہد، لازوال قربانیوں اور حقِ خودارادیت کے مطالبے کو دنیا کے سامنے اجاگر کرنا ہے۔
اس موقع پر پاکستان میں عام تعطیل ہے، جبکہ مظفر آباد میں صبح نو سے دس بجے کے درمیان سائرن بجائے گئے اور کشمیری شہداء کو خراجِ عقیدت پیش کرنے کے لیے ایک منٹ کی خاموشی اختیار کی گئی۔
ملک کے مختلف حصوں میں ریلیاں، سیمینارز، تقاریب اور یکجہتی اجتماعات منعقد کیے جا رہے ہیں، جبکہ آزاد کشمیر اور پاکستان کو ملانے والے راستوں پر انسانی ہاتھوں کی زنجیر بنا کر مقبوضہ وادی کے عوام سے غیر متزلزل حمایت کا اظہار کیا جا رہا ہے۔
آزاد جموں و کشمیر قانون ساز اسمبلی کا خصوصی اجلاس بھی آج منعقد ہو رہا ہے، جس میں مسئلہ کشمیر پر تفصیلی غور کیا جائے گا۔
وزیراعظم شہباز شریف مظفر آباد پہنچ کر کشمیری عوام سے اظہارِ یکجہتی کریں گے۔یومِ یکجہتی کشمیر کے موقع پر صدر مملکت آصف علی زرداری اور وزیراعظم شہباز شریف نے اپنے الگ الگ پیغامات میں کشمیری عوام کی حمایت جاری رکھنے کے عزم کا اعادہ کیا۔
صدر مملکت نے کہا کہ یہ دن کشمیریوں کے ساتھ پاکستان کی غیر متزلزل وابستگی کی علامت ہے اور اقوامِ متحدہ کی قراردادوں کے مطابق کشمیری عوام کو حقِ خودارادیت دینا عالمی ذمہ داری ہے۔
وزیراعظم شہباز شریف نے مقبوضہ کشمیر کی خصوصی حیثیت کے خاتمے کو غیر قانونی قرار دیتے ہوئے واضح کیا کہ پاکستان کشمیری عوام کی اخلاقی، سفارتی اور سیاسی حمایت ہر سطح پر جاری رکھے گا۔
افواجِ پاکستان نے بھی مقبوضہ کشمیر میں جاری انسانی حقوق کی سنگین خلاف ورزیوں کی شدید مذمت کرتے ہوئے کشمیری عوام کے ساتھ مکمل یکجہتی کا اظہار کیا۔
فیلڈ مارشل عاصم منیر، نیول چیف اور ایئر چیف نے کشمیریوں کے حقِ خودارادیت کی حمایت کو پاکستان کا اصولی مؤقف قرار دیا۔آئی ایس پی آر کے مطابق مقبوضہ کشمیر میں ماورائے عدالت قتل، جبری گمشدگیاں، غیر قانونی گرفتاریاں اور آبادیاتی تبدیلی کی کوششیں بین الاقوامی قوانین کی صریح خلاف ورزی ہیں۔
بیان میں کہا گیا کہ جنوبی ایشیا میں پائیدار امن مسئلہ کشمیر کے منصفانہ حل کے بغیر ممکن نہیں، اور عالمی برادری کو کشمیری عوام کی مشکلات کم کرنے کے لیے عملی کردار ادا کرنا ہوگا۔
سرکاری اعداد و شمار کے مطابق گزشتہ کئی دہائیوں کے دوران مقبوضہ جموں و کشمیر میں لاکھوں جانیں ضائع ہو چکی ہیں، جبکہ ہزاروں خاندان ظلم، تشدد اور جبری گمشدگیوں کا شکار رہے۔
پانچ اگست 2019 کے بعد بھارتی جبر میں نمایاں اضافہ دیکھا گیا، جس کے نتیجے میں مزید بے گناہ کشمیری شہید اور گرفتار کیے گئے۔
یومِ یکجہتی کشمیر اس عزم کے ساتھ منایا جا رہا ہے کہ پاکستان کشمیری عوام کے شانہ بشانہ کھڑا ہے، ان کی قربانیاں رائیگاں نہیں جائیں گی، اور وہ دن ضرور آئے گا جب کشمیر کے عوام آزادی اور وقار کے ساتھ اپنی تقدیر کا فیصلہ خود کریں گے۔