کنشاسا : (پاک ترک نیوز)وسطی افریقی ملک کانگو ایک ہولناک سانحے سے دوچار ہو گیا جہاں قیمتی معدنیات کی ایک بڑی کان اچانک زمین بوس ہو گئی۔
ابتدائی اطلاعات کے مطابق اس افسوسناک حادثے میں 200 سے زائد افراد جان سے ہاتھ دھو بیٹھے، جب کہ درجنوں زخمی زندگی اور موت کی کشمکش میں مبتلا ہیں۔
بین الاقوامی ذرائع ابلاغ کے مطابق مشرقی کانگو کے علاقے ربایا میں واقع کالٹن دھات کی کان بدھ کے روز شدید بارشوں کے بعد لینڈ سلائیڈنگ کے باعث بیٹھ گئی۔
یہ علاقہ ایک باغی گروہ کے اثر و رسوخ میں ہے، جس کی وجہ سے امدادی سرگرمیوں اور ہلاکتوں کی درست تعداد معلوم کرنے میں مشکلات پیش آ رہی ہیں۔
حادثے کے وقت کان کے اندر بڑی تعداد میں مزدور موجود تھے، جن میں خواتین اور کم عمر بچے بھی شامل تھے۔ مٹی اور پتھروں کے تودے نے چند لمحوں میں سب کچھ دفن کر دیا۔
مقامی حکام کے مطابق اب تک کم از کم 20 شدید زخمیوں کو قریبی طبی مراکز منتقل کیا جا چکا ہے۔صوبائی انتظامیہ کا کہنا ہے کہ موسلا دھار بارشوں کے باعث زمین غیر معمولی حد تک نرم ہو چکی تھی، جس کے نتیجے میں کان کا ڈھانچہ وزن برداشت نہ کر سکا اور مکمل طور پر بیٹھ گیا۔
واضح رہے کہ ربایا کا علاقہ دنیا میں کالٹن کی پیداوار کا ایک بڑا مرکز سمجھا جاتا ہے، جہاں سے حاصل ہونے والی دھات ٹینٹالم کی تیاری میں استعمال ہوتی ہے۔
یہی دھات جدید موبائل فونز، کمپیوٹرز، ایرو اسپیس ٹیکنالوجی اور ٹربائنز میں کلیدی حیثیت رکھتی ہے، مگر اس ترقی کی قیمت ایک بار پھر انسانی جانوں کی صورت میں ادا کی گئی۔
کانگو: زمین نگل گئی انسانی زندگیاں، کان بیٹھنے سے 200 سے زائد افراد ہلاک
متعلقہ خبریں
یہ بھی پڑھیں
